{"collection":"Bible & Christianity","html_url":"https://unchartedknowledge.5gfusion.net/browse/bib/vul/neh009.htm","path":"bib/vul/neh009.htm","source_url":"https://sacred-texts.com/bib/vul/neh009.htm","text":"1 In die autem vigesimo quarto mensis hujus, convenerunt filii Isra\u00ebl in jejunio et in saccis, et humus super eos.\n2 Et separatum est semen filiorum Isra\u00ebl ab omni filio alienigena: et steterunt, et confitebantur peccata sua, et iniquitates patrum suorum.\n3 Et consurrexerunt ad standum: et legerunt in volumine legis Domini Dei sui, quater in die, et quater confitebantur, et adorabant Dominum Deum suum.\n4 Surrexerunt autem super gradum Levitarum Josue, et Bani, et Cedmihel, Sabania, Bonni, Sarebias, Bani, et Chanani: et clamaverunt voce magna ad Dominum Deum suum.\n5 Et dixerunt Levit\u00e6 Josue, et Cedmihel, Bonni, Hasebnia, Serebia, Odaia, Sebnia, Phathathia: Surgite, benedicite Domino Deo vestro ab \u00e6terno usque in \u00e6ternum: et benedicant nomini glori\u00e6 tu\u00e6 excelso in omni benedictione et laude.\n6 Tu ipse, Domine, solus, tu fecisti c\u00e6lum, et c\u00e6lum c\u00e6lorum, et omnem exercitum eorum: terram, et universa qu\u00e6 in ea sunt: maria, et omnia qu\u00e6 in eis sunt: et tu vivificas omnia h\u00e6c, et exercitus c\u00e6li te adorat.\n7 Tu ipse, Domine Deus, qui elegisti Abram, et eduxisti eum de igne Chald\u00e6orum, et posuisti nomen ejus Abraham:\n8\u00a0et invenisti cor ejus fidele coram te, et percussisti cum eo f\u0153dus ut dares ei terram Chanan\u00e6i, Heth\u00e6i, et Amorrh\u00e6i, et Pherez\u00e6i, et Jebus\u00e6i, et Gerges\u00e6i, ut dares semini ejus: et implesti verba tua, quoniam justus es.\n \n9 Et vidisti afflictionem patrum nostrorum in \u00c6gypto, clamoremque eorum audisti super mare Rubrum.\n10 Et dedisti signa atque portenta in Pharaone, et in universis servis ejus, et in omni populo terr\u00e6 illius: cognovisti enim quia superbe egerant contra eos: et fecisti tibi nomen, sicut et in hac die.\n11 Et mare divisisti ante eos, et transierunt per medium maris in sicco: persecutores autem eorum projecisti in profundum, quasi lapidem in aquas validas.\n12 Et in columna nubis ductor eorum fuisti per diem, et in columna ignis per noctem, ut appareret eis via per quam ingrediebantur.\n13 Ad montem quoque Sinai descendisti, et locutus es cum eis de c\u00e6lo, et dedisti eis judicia recta, et legem veritatis, c\u00e6remonias, et pr\u00e6cepta bona:\n14 et sabbatum sanctificatum tuum ostendisti eis: et mandata, et c\u00e6remonias, et legem pr\u00e6cepisti eis in manu Moysi servi tui.\n15\u00a0Panem quoque de c\u00e6lo dedisti eis in fame eorum, et aquam de petra eduxisti eis sitientibus, et dixisti eis ut ingrederentur et possiderent terram, super quam levasti manum tuam ut traderes eis.\n \n16 Ipsi vero et patres nostri superbe egerunt, et induraverunt cervices suas, et non audierunt mandata tua.\n17 Et noluerunt audire, et non sunt recordati mirabilium tuorum qu\u00e6 feceras eis. Et induraverunt cervices suas, et dederunt caput ut converterentur ad servitutem suam, quasi per contentionem. Tu autem, Deus propitius, clemens, et misericors, longanimis, et mult\u00e6 miserationis, non dereliquisti eos,\n18 et quidem cum fecissent sibi vitulum conflatilem, et dixissent: Iste est deus tuus, qui eduxit te de \u00c6gypto: feceruntque blasphemias magnas:\n19 tu autem in misericordiis tuis multis non dimisisti eos in deserto: columna nubis non recessit ab eis per diem ut duceret eos in viam, et columna ignis per noctem ut ostenderet eis iter per quod ingrederentur.\n20 Et spiritum tuum bonum dedisti, qui doceret eos: et manna tuum non prohibuisti ab ore eorum, et aquam dedisti eis in siti.\n21 Quadraginta annis pavisti eos in deserto, nihilque eis defuit: vestimenta eorum non inveteraverunt, et pedes eorum non sunt attriti.\n22 Et dedisti eis regna, et populos, et partitus es eis sortes: et possederunt terram Sehon, et terram regis Hesebon, et terram Og regis Basan.\n23 Et multiplicasti filios eorum sicut stellas c\u00e6li, et adduxisti eos ad terram de qua dixeras patribus eorum ut ingrederentur et possiderent.\n24 Et venerunt filii, et possederunt terram, et humiliasti coram eis habitatores terr\u00e6 Chanan\u00e6os, et dedisti eos in manu eorum, et reges eorum, et populos terr\u00e6, ut facerent eis sicut placebant illis.\n25\u00a0Ceperunt itaque urbes munitas et humum pinguem, et possederunt domos plenas cunctis bonis: cisternas ab aliis fabricatas, vineas, et oliveta, et ligna pomifera multa: et comederunt, et saturati sunt, et impinguati sunt, et abundaverunt deliciis in bonitate tua magna.\n \n26 Provocaverunt autem te ad iracundiam, et recesserunt a te, et projecerunt legem tuam post terga sua: et prophetas tuos occiderunt, qui contestabantur eos ut reverterentur ad te: feceruntque blasphemias grandes.\n27 Et dedisti eos in manu hostium suorum, et afflixerunt eos. Et in tempore tribulationis su\u00e6 clamaverunt ad te, et tu de c\u00e6lo audisti, et secundum miserationes tuas multas dedisti eis salvatores, qui salvarent eos de manu hostium suorum.\n28 Cumque requievissent, reversi sunt ut facerent malum in conspectu tuo, et dereliquisti eos in manu inimicorum suorum, et possederunt eos. Conversique sunt, et clamaverunt ad te: tu autem de c\u00e6lo exaudisti, et liberasti eos in misericordiis tuis, multis temporibus.\n29 Et contestatus es eos ut reverterentur ad legem tuam. Ipsi vero superbe egerunt, et non audierunt mandata tua, et in judiciis tuis peccaverunt, qu\u00e6 faciet homo, et vivet in eis: et dederunt humerum recedentem, et cervicem suam induraverunt, nec audierunt.\n30 Et protraxisti super eos annos multos, et contestatus es eos in spiritu tuo per manum prophetarum tuorum: et non audierunt, et tradidisti eos in manu populorum terrarum.\n31\u00a0In misericordiis autem tuis plurimis non fecisti eos in consumptionem, nec dereliquisti eos: quoniam Deus miserationum et clemens es tu.\n \n32 Nunc itaque Deus noster magne, fortis et terribilis, custodiens pactum et misericordiam, ne avertas a facie tua omnem laborem, qui invenit nos, reges nostros, et principes nostros, et sacerdotes nostros, et prophetas nostros, et patres nostros, et omnem populum tuum a diebus regis Assur usque in diem hanc.\n33 Et tu justus es in omnibus qu\u00e6 venerunt super nos: quia veritatem fecisti, nos autem impie egimus.\n34 Reges nostri, principes nostri, sacerdotes nostri et patres nostri non fecerunt legem tuam, et non attenderunt mandata tua, et testimonia tua qu\u00e6 testificatus es in eis.\n35 Et ipsi in regnis suis, et in bonitate tua multa quam dederas eis, et in terra latissima et pingui quam tradideras in conspectu eorum, non servierunt tibi, nec reversi sunt a studiis suis pessimis.\n36 Ecce nos ipsi hodie servi sumus: et terra quam dedisti patribus nostris ut comederent panem ejus, et qu\u00e6 bona sunt ejus, et nos ipsi servi sumus in ea.\n37 Et fruges ejus multiplicantur regibus quos posuisti super nos propter peccata nostra: et corporibus nostris dominantur, et jumentis nostris secundum voluntatem suam: et in tribulatione magna sumus.\n38 Super omnibus ergo his nos ipsi percutimus f\u0153dus, et scribimus: et signant principes nostri, Levit\u00e6 nostri, et sacerdotes nostri.","title":"Vulgate: Nehemiah: Nehemiah Chapter 9","type":"page"}