{"collection":"Bible & Christianity","html_url":"https://unchartedknowledge.5gfusion.net/browse/bib/vul/num001.htm","path":"bib/vul/num001.htm","source_url":"https://sacred-texts.com/bib/vul/num001.htm","text":"1 Locutusque est Dominus ad Moysen in deserto Sinai in tabernaculo f\u0153deris, prima die mensis secundi, anno altero egressionis eorum ex \u00c6gypto, dicens:\n2 Tollite summam univers\u00e6 congregationis filiorum Isra\u00ebl per cognationes et domos suas, et nomina singulorum, quidquid sexus est masculini\n3 a vigesimo anno et supra, omnium virorum fortium ex Isra\u00ebl, et numerabitis eos per turmas suas, tu et Aaron.\n4 Eruntque vobiscum principes tribuum ac domorum in cognationibus suis,\n5 quorum ista sunt nomina: de Ruben, Elisur, filius Sedeur;\n6 de Simeon, Salamiel filius Surisaddai;\n7 de Juda, Nahasson filius Aminadab;\n8 de Issachar, Nathana\u00ebl filius Suar;\n9 de Zabulon, Eliab filius Helon;\n10 filiorum autem Joseph, de Ephraim, Elisama filius Ammiud; de Manasse, Gamaliel filius Phadassur;\n11 de Benjamin, Abidan filius Gedeonis;\n12 de Dan, Ahiezer filius Ammisaddai;\n13 de Aser, Phegiel filius Ochran;\n14 de Gad, Eliasaph filius Duel;\n15 de Nephthali, Ahira filius Enan.\n16 Hi nobilissimi principes multitudinis per tribus et cognationes suas, et capita exercitus Isra\u00ebl,\n17 quos tulerunt Moyses et Aaron cum omni vulgi multitudine:\n18 et congregaverunt primo die mensis secundi, recensentes eos per cognationes, et domos, ac familias, et capita, et nomina singulorum a vigesimo anno et supra,\n19\u00a0sicut pr\u00e6ceperat Dominus Moysi. Numeratique sunt in deserto Sinai.\n \n20 De Ruben primogenito Isra\u00eblis per generationes et familias ac domos suas, et nomina capitum singulorum, omne quod sexus est masculini a vigesimo anno et supra, procedentium ad bellum,\n21 quadraginta sex millia quingenti.\n22 De filiis Simeon per generationes et familias ac domos cognationum suarum recensiti sunt per nomina et capita singulorum, omne quod sexus est masculini a vigesimo anno et supra, procedentium ad bellum,\n23 quinquaginta novem millia trecenti.\n24 De filiis Gad per generationes et familias ac domos cognationum suarum recensiti sunt per nomina singulorum a viginti annis et supra, omnes qui ad bella procederent,\n25 quadraginta quinque millia sexcenti quinquaginta.\n26 De filiis Juda per generationes et familias ac domos cognationum suarum, per nomina singulorum a vigesimo anno et supra, omnes qui poterant ad bella procedere,\n27 recensiti sunt septuaginta quatuor millia sexcenti.\n28 De filiis Issachar, per generationes et familias ac domos cognationum suarum, per nomina singulorum a vigesimo anno et supra, omnes qui ad bella procederent,\n29 recensiti sunt quinquaginta quatuor millia quadringenti.\n30 De filiis Zabulon per generationes et familias ac domos cognationum suarum recensiti sunt per nomina singulorum a vigesimo anno et supra, omnes qui poterant ad bella procedere,\n31 quinquaginta septem millia quadringenti.\n32 De filiis Joseph, filiorum Ephraim per generationes et familias ac domos cognationum suarum recensiti sunt per nomina singulorum a vigesimo anno et supra, omnes qui poterant ad bella procedere,\n33 quadraginta millia quingenti.\n34 Porro filiorum Manasse per generationes et familias ac domos cognationum suarum recensiti sunt per nomina singulorum a viginti annis et supra, omnes qui poterant ad bella procedere,\n35 triginta duo millia ducenti.\n36 De filiis Benjamin per generationes et familias ac domos cognationum suarum recensiti sunt nominibus singulorum a vigesimo anno et supra, omnes qui poterant ad bella procedere,\n37 triginta quinque millia quadringenti.\n38 De filiis Dan per generationes et familias ac domos cognationum suarum recensiti sunt nominibus singulorum a vigesimo anno et supra, omnes qui poterant ad bella procedere,\n39 sexaginta duo millia septingenti.\n40 De filiis Aser per generationes et familias ac domos cognationum suarum recensiti sunt per nomina singulorum a vigesimo anno et supra, omnes qui poterant ad bella procedere,\n41 quadraginta millia et mille quingenti.\n42 De filiis Nephthali per generationes et familias ac domos cognationum suarum recensiti sunt nominibus singulorum a vigesimo anno et supra, omnes qui poterant ad bella procedere,\n43\u00a0quinquaginta tria millia quadringenti.\n \n44 Hi sunt, quos numeraverunt Moyses et Aaron, et duodecim principes Isra\u00ebl, singulos per domos cognationum suarum.\n45 Fueruntque omnis numerus filiorum Isra\u00ebl per domos et familias suas a vigesimo anno et supra, qui poterant ad bella procedere,\n46\u00a0sexcenta tria millia virorum quingenti quinquaginta.\n \n47 Levit\u00e6 autem in tribu familiarum suarum non sunt numerati cum eis.\n48 Locutusque est Dominus ad Moysen, dicens:\n49 Tribum Levi noli numerare, neque pones summam eorum cum filiis Isra\u00ebl:\n50 sed constitue eos super tabernaculum testimonii et cuncta vasa ejus, et quidquid ad c\u00e6remonias pertinet. Ipsi portabunt tabernaculum et omnia utensilia ejus: et erunt in ministerio, ac per gyrum tabernaculi metabuntur.\n51 Cum proficiscendum fuerit, deponent Levit\u00e6 tabernaculum; cum castrametandum, erigent. Quisquis externorum accesserit, occidetur.\n52 Metabuntur autem castra filii Isra\u00ebl unusquisque per turmas et cuneos atque exercitum suum.\n53 Porro Levit\u00e6 per gyrum tabernaculi figent tentoria, ne fiat indignatio super multitudinem filiorum Isra\u00ebl, et excubabunt in custodiis tabernaculi testimonii.\n54 Fecerunt ergo filii Isra\u00ebl juxta omnia qu\u00e6 pr\u00e6ceperat Dominus Moysi.","title":"Vulgate: Numbers: Numbers Chapter 1","type":"page"}