{"collection":"Bible & Christianity","html_url":"https://unchartedknowledge.5gfusion.net/browse/bib/vul/num013.htm","path":"bib/vul/num013.htm","source_url":"https://sacred-texts.com/bib/vul/num013.htm","text":"1 Profectusque est populus de Haseroth, fixis tentoriis in deserto Pharan.\n2 Ibique locutus est Dominus ad Moysen, dicens:\n3 Mitte viros, qui considerent terram Chanaan, quam daturus sum filiis Isra\u00ebl, singulos de singulis tribubus, ex principibus.\n4 Fecit Moyses quod Dominus imperaverat, de deserto Pharan mittens principes viros, quorum ista sunt nomina.\n5 De tribu Ruben, Sammua filium Zechur.\n6 De tribu Simeon, Saphat filium Huri.\n7 De tribu Juda, Caleb filium Jephone.\n8 De tribu Issachar, Igal filium Joseph.\n9 De tribu Ephraim, Osee filium Nun.\n10 De tribu Benjamin, Phalti filium Raphu.\n11 De tribu Zabulon, Geddiel filium Sodi.\n12 De tribu Joseph, sceptri Manasse, Gaddi filium Susi.\n13 De tribu Dan, Ammiel filium Gemalli.\n14 De tribu Aser, Sthur filium Micha\u00ebl.\n15 De tribu Nephthali, Nahabi filium Vapsi.\n16 De tribu Gad, Guel filium Machi.\n17\u00a0H\u00e6c sunt nomina virorum, quos misit Moyses ad considerandam terram: vocavitque Osee filium Nun, Josue.\n \n18 Misit ergo eos Moyses ad considerandam terram Chanaan, et dixit ad eos: Ascendite per meridianam plagam. Cumque veneritis ad montes,\n19 considerate terram, qualis sit: et populum qui habitator est ejus, utrum fortis sit an infirmus: si pauci numero an plures:\n20 ipsa terra, bona an mala: urbes quales, murat\u00e6 an absque muris:\n21 humus, pinguis an sterilis, nemorosa an absque arboribus. Confortamini, et afferte nobis de fructibus terr\u00e6. Erat autem tempus quando jam pr\u00e6coqu\u00e6 uv\u00e6 vesci possunt.\n22 Cumque ascendissent, exploraverunt terram a deserto Sin, usque Rohob intrantibus Emath.\n23 Ascenderuntque ad meridiem, et venerunt in Hebron, ubi erant Achiman et Sisai et Tholmai filii Enac: nam Hebron septem annis ante Tanim urbem \u00c6gypti condita est.\n24 Pergentesque usque ad Torrentem botri, absciderunt palmitem cum uva sua, quem portaverunt in vecte duo viri. De malis quoque granatis et de ficis loci illius tulerunt:\n25\u00a0qui appellatus est Nehelescol, id est Torrens botri, eo quod botrum portassent inde filii Isra\u00ebl.\n \n26 Reversique exploratores terr\u00e6 post quadraginta dies, omni regione circuita,\n27 venerunt ad Moysen et Aaron et ad omnem c\u0153tum filiorum Isra\u00ebl in desertum Pharan, quod est in Cades. Locutique eis et omni multitudini ostenderunt fructus terr\u00e6:\n28 et narraverunt, dicentes: Venimus in terram, ad quam misisti nos, qu\u00e6 revera fluit lacte et melle, ut ex his fructibus cognosci potest:\n29 sed cultores fortissimos habet, et urbes grandes atque muratas. Stirpem Enac vidimus ibi.\n30 Amalec habitat in meridie, Heth\u00e6us et Jebus\u00e6us et Amorrh\u00e6us in montanis: Chanan\u00e6us vero moratur juxta mare et circa fluenta Jordanis.\n31 Inter h\u00e6c Caleb compescens murmur populi, qui oriebatur contra Moysen, ait: Ascendamus, et possideamus terram, quoniam poterimus obtinere eam.\n32 Alii vero, qui fuerant cum eo, dicebant: Nequaquam ad hunc populum valemus ascendere, quia fortior nobis est.\n33 Detraxeruntque terr\u00e6, quam inspexerant, apud filios Isra\u00ebl, dicentes: Terra, quam lustravimus, devorat habitatores suos: populus, quem aspeximus, procer\u00e6 statur\u00e6 est.\n34 Ibi vidimus monstra qu\u00e6dam filiorum Enac de genere giganteo: quibus comparati, quasi locust\u00e6 videbamur.","title":"Vulgate: Numbers: Numbers Chapter 13","type":"page"}