{"collection":"Bible & Christianity","html_url":"https://unchartedknowledge.5gfusion.net/browse/bib/vul/num015.htm","path":"bib/vul/num015.htm","source_url":"https://sacred-texts.com/bib/vul/num015.htm","text":"1 Locutus est Dominus ad Moysen, dicens:\n2 Loquere ad filios Isra\u00ebl, et dices ad eos: Cum ingressi fueritis terram habitationis vestr\u00e6, quam ego dabo vobis,\n3 et feceritis oblationem Domino in holocaustum, aut victimam, vota solventes, vel sponte offerentes munera, aut in solemnitatibus vestris adolentes odorem suavitatis Domino, de bobus sive de ovibus:\n4 offeret quicumque immolaverit victimam, sacrificium simil\u00e6, decimam partem ephi, conspers\u00e6 oleo, quod mensuram habebit quartam partem hin:\n5 et vinum ad liba fundenda ejusdem mensur\u00e6 dabit in holocaustum sive in victimam. Per agnos singulos\n6 et arietes erit sacrificium simil\u00e6 duarum decimarum, qu\u00e6 conspersa sit oleo terti\u00e6 partis hin:\n7 et vinum ad libamentum terti\u00e6 partis ejusdem mensur\u00e6 offeret in odorem suavitatis Domino.\n8 Quando vero de bobus feceris holocaustum aut hostiam, ut impleas votum vel pacificas victimas,\n9 dabis per singulos boves simil\u00e6 tres decimas conspers\u00e6 oleo, quod habeat medium mensur\u00e6 hin:\n10 et vinum ad liba fundenda ejusdem mensur\u00e6 in oblationem suavissimi odoris Domino.\n11 Sic facies\n12 per singulos boves et arietis et agnos et h\u00e6dos.\n13 Tam indigen\u00e6 quam peregrini\n14 eodem ritu offerent sacrificia.\n15\u00a0Unum pr\u00e6ceptum erit atque judicium tam vobis quam advenis terr\u00e6.\n \n16 Locutus est Dominus ad Moysen, dicens:\n17 Loquere filiis Isra\u00ebl, et dices ad eos:\n18 Cum veneritis in terram, quam dabo vobis,\n19 et comederitis de panibus regionis illius, separabitis primitias Domino\n20 de cibis vestris. Sicut de areis primitias separatis,\n21\u00a0ita et de pulmentis dabitis primitiva Domino.\n \n22 Quod si per ignorantiam pr\u00e6terieritis quidquam horum, qu\u00e6 locutus est Dominus ad Moysen,\n23 et mandavit per eum ad vos, a die qua c\u0153pit jubere et ultra,\n24 oblitaque fuerit facere multitudo: offeret vitulum de armento, holocaustum in odorem suavissimum Domino, et sacrificum ejus ac liba, ut c\u00e6remoni\u00e6 postulant, hircumque pro peccato:\n25 et rogabit sacerdos pro omni multitudine filiorum Isra\u00ebl, et dimittetur eis, quoniam non sponte peccaverunt, nihilominus offerentes incensum Domino pro se et pro peccato atque errore suo:\n26 et dimittetur univers\u00e6 plebi filiorum Isra\u00ebl, et advenis qui peregrinantur inter eos: quoniam culpa est omnis populi per ignorantiam.\n27 Quod si anima una nesciens peccaverit, offeret capram anniculam pro peccato suo:\n28 et deprecabitur pro ea sacerdos, quod inscia peccaverit coram Domino: impetrabitque ei veniam, et dimittetur illi.\n29 Tam indigenis quam advenis una lex erit omnium, qui peccaverint ignorantes.\n30 Anima vero, qu\u00e6 per superbiam aliquid commiserit, sive civis sit ille, sive peregrinus (quoniam adversus Dominum rebellis fuit), peribit de populo suo:\n31\u00a0verbum enim Domini contempsit, et pr\u00e6ceptum illius fecit irritum: idcirco delebitur, et portabit iniquitatem suam.\n \n32 Factum est autem, cum essent filii Isra\u00ebl in solitudine, et invenissent hominem colligentem ligna in die sabbati,\n33 obtulerunt eum Moysi et Aaron et univers\u00e6 multitudini.\n34 Qui recluserunt eum in carcerem, nescientes quid super eo facere deberent.\n35 Dixitque Dominus ad Moysen: Morte moriatur homo iste: obruat eum lapidibus omnis turba extra castra.\n36\u00a0Cumque eduxissent eum foras, obruerunt lapidibus, et mortuus est, sicut pr\u00e6ceperat Dominus.\n \n37 Dixit quoque Dominus ad Moysen:\n38 Loquere filiis Isra\u00ebl, et dices ad eos ut faciant sibi fimbrias per angulos palliorum, ponentes in eis vittas hyacinthinas:\n39 quas cum viderint, recordentur omnium mandatorum Domini, nec sequantur cogitationes suas et oculos per res varias fornicantes,\n40 sed magis memores pr\u00e6ceptorum Domini faciant ea, sintque sancti Deo suo.\n41 Ego Dominus Deus vester, qui eduxi vos de terra \u00c6gypti, ut essem Deus vester.","title":"Vulgate: Numbers: Numbers Chapter 15","type":"page"}