{"collection":"Bible & Christianity","html_url":"https://unchartedknowledge.5gfusion.net/browse/bib/vul/num018.htm","path":"bib/vul/num018.htm","source_url":"https://sacred-texts.com/bib/vul/num018.htm","text":"1 Dixitque Dominus ad Aaron: Tu, et filii tui, et domus patris tui tecum, portabitis iniquitatem sanctuarii: et tu et filii tui simul sustinebitis peccata sacerdotii vestri.\n2 Sed et fratres tuos de tribu Levi, et sceptrum patris tui sume tecum, pr\u00e6stoque sint, et ministrent tibi: tu autem et filii tui ministrabitis in tabernaculo testimonii.\n3 Excubabuntque Levit\u00e6 ad pr\u00e6cepta tua, et ad cuncta opera tabernaculi: ita dumtaxat ut ad vasa sanctuarii et ad altare non accedant, ne et illi moriantur, et vos pereatis simul.\n4 Sint autem tecum, et excubent in custodiis tabernaculi, et in omnibus c\u00e6remoniis ejus. Alienigena non miscebitur vobis.\n5 Excubate in custodia sanctuarii, et in ministerio altaris: ne oriatur indignatio super filios Isra\u00ebl.\n6 Ego dedi vobis fratres vestros Levitas de medio filiorum Isra\u00ebl, et tradidi donum Domino, ut serviant in ministeriis tabernaculi ejus.\n7\u00a0Tu autem et filii tui custodite sacerdotium vestrum: et omnia qu\u00e6 ad cultum altaris pertinent, et intra velum sunt, per sacerdotes administrabuntur: si quis externus accesserit, occidetur.\n \n8 Locutusque est Dominus ad Aaron: Ecce dedi tibi custodiam primitiarum mearum. Omnia qu\u00e6 sanctificantur a filiis Isra\u00ebl, tradidi tibi et filiis tuis pro officio sacerdotali legitima sempiterna.\n9 H\u00e6c ergo accipies de his, qu\u00e6 sanctificantur et oblata sunt Domino. Omnis oblatio, et sacrificium, et quidquid pro peccato atque delicto redditur mihi, et cedit in Sancta sanctorum, tuum erit, et filiorum tuorum.\n10 In sanctuario comedes illud: mares tantum edent ex eo, quia consecratum est tibi.\n11 Primitias autem, quas voverint et obtulerint filii Isra\u00ebl, tibi dedi, et filiis tuis, ac filiabus tuis, jure perpetuo: qui mundus est in domo tua, vescetur eis.\n12 Omnem medullam olei, et vini, ac frumenti, quidquid offerunt primitiarum Domino, tibi dedi.\n13 Universa frugum initia, quas gignit humus, et Domino deportantur, cedent in usus tuos: qui mundus est in domo tua, vescetur eis.\n14 Omne quod ex voto reddiderint filii Isra\u00ebl, tuum erit.\n15 Quidquid primum erumpit e vulva cunct\u00e6 carnis, quam offerunt Domino, sive ex hominibus, sive de pecoribus fuerit, tui juris erit: ita dumtaxat ut pro hominis primogenito pretium accipias, et omne animal quod immundum est redimi facias,\n16 cujus redemptio erit post unum mensem, siclis argenti quinque, pondere sanctuarii. Siclus viginti obolos habet.\n17 Primogenitum autem bovis, et ovis, et capr\u00e6, non facies redimi, quia sanctificata sunt Domino. Sanguinem tantum eorum fundes super altare, et adipes adolebis in suavissimum odorem Domino.\n18 Carnes vero in usum tuum cedent, sicut pectusculum consecratum, et armus dexter: tua erunt.\n19\u00a0Omnes primitias sanctuarii, quas offerunt filii Isra\u00ebl Domino, tibi dedi, et filiis, ac filiabus tuis, jure perpetuo. Pactum salis est sempiternum coram Domino, tibi ac filiis tuis.\n \n20 Dixitque Dominus ad Aaron: In terra eorum nihil possidebitis, nec habebitis partem inter eos: ego pars et h\u00e6reditas tua in medio filiorum Isra\u00ebl.\n21 Filiis autem Levi dedi omnes decimas Isra\u00eblis in possessionem, pro ministerio, quo serviunt mihi in tabernaculo f\u0153deris:\n22 ut non accedant ultra filii Isra\u00ebl ad tabernaculum, nec committant peccatum mortiferum,\n23 solis filiis Levi mihi in tabernaculo servientibus, et portantibus peccata populi. Legitimum sempiternum erit in generationibus vestris. Nihil aliud possidebunt,\n24\u00a0decimarum oblatione contenti, quas in usus eorum et necessaria separavi.\n \n25 Locutusque est Dominus ad Moysen, dicens:\n26 Pr\u00e6cipe Levitis, atque denuntia: Cum acceperitis a filiis Isra\u00ebl decimas, quas dedi vobis, primitias earum offerte Domino, id est, decimam partem decim\u00e6,\n27 ut reputetur vobis in oblationem primitivorum, tam de areis quam de torcularibus:\n28 et universis quorum accipitis primitias, offerte Domino, et date Aaron sacerdoti.\n29 Omnia qu\u00e6 offeretis ex decimis, et in donaria Domini separabitis, optima et electa erunt.\n30 Dicesque ad eos: Si pr\u00e6clara et meliora qu\u00e6que obtuleritis ex decimis, reputabitur vobis quasi de area, et torculari dederitis primitias:\n31 et comedetis eas in omnibus locis vestris, tam vos quam famili\u00e6 vestr\u00e6: quia pretium est pro ministerio, quo servitis in tabernaculo testimonii.\n32 Et non peccabitis super hoc, egregia vobis et pinguia reservantes, ne polluatis oblationes filiorum Isra\u00ebl, et moriamini.","title":"Vulgate: Numbers: Numbers Chapter 18","type":"page"}