{"collection":"Bible & Christianity","html_url":"https://unchartedknowledge.5gfusion.net/browse/bib/vul/num019.htm","path":"bib/vul/num019.htm","source_url":"https://sacred-texts.com/bib/vul/num019.htm","text":"1 Locutusque est Dominus ad Moysen et Aaron, dicens:\n2 Ista est religio victim\u00e6, quam constituit Dominus. Pr\u00e6cipe filiis Isra\u00ebl, ut adducant ad te vaccam rufam \u00e6tatis integr\u00e6, in qua nulla sit macula, nec portaverit jugum:\n3 tradetisque eam Eleazaro sacerdoti, qui eductam extra castra, immolabit in conspectu omnium:\n4 et tingens digitum in sanguine ejus, asperget contra fores tabernaculi septem vicibus,\n5 comburetque eam cunctis videntibus, tam pelle et carnibus ejus quam sanguine et fimo flamm\u00e6 traditis.\n6 Lignum quoque cedrinum, et hyssopum, coccumque bis tinctum sacerdos mittet in flammam, qu\u00e6 vaccam vorat.\n7 Et tunc demum, lotis vestibus et corpore suo, ingredietur in castra, commaculatusque erit usque ad vesperum.\n8 Sed et ille qui combusserit eam, lavabit vestimenta sua et corpus, et immundus erit usque ad vesperum.\n9 Colliget autem vir mundus cineres vacc\u00e6, et effundet eos extra castra in loco purissimo, ut sint multitudini filiorum Isra\u00ebl in custodiam, et in aquam aspersionis: quia pro peccato vacca combusta est.\n10\u00a0Cumque laverit qui vacc\u00e6 portaverat cineres vestimenta sua, immundus erit usque ad vesperum. Habebunt hoc filii Isra\u00ebl, et adven\u00e6 qui habitant inter eos, sanctum jure perpetuo.\n \n11 Qui tetigerit cadaver hominis, et propter hoc septem diebus fuerit immundus,\n12 aspergetur ex hac aqua die tertio et septimo, et sic mundabitur. Si die tertio aspersus non fuerit, septimo non poterit emundari.\n13 Omnis qui tetigerit human\u00e6 anim\u00e6 morticinum, et aspersus hac commistione non fuerit, polluet tabernaculum Domini et peribit ex Isra\u00ebl: quia aqua expiationis non est aspersus, immundus erit, et manebit spurcitia ejus super eum.\n14 Ista est lex hominis qui moritur in tabernaculo: omnes qui ingrediuntur tentorium illius, et universa vasa qu\u00e6 ibi sunt, polluta erunt septem diebus.\n15 Vas, quod non habuerit operculum nec ligaturam desuper, immundum erit.\n16 Si quis in agro tetigerit cadaver occisi hominis, aut per se mortui, sive os illius, vel sepulchrum, immundus erit septem diebus.\n17 Tollentque de cineribus combustionis atque peccati, et mittent aquas vivas super eos in vas:\n18 in quibus cum homo mundus tinxerit hyssopum, asperget ex eo omne tentorium, et cunctam supellectilem, et homines hujuscemodi contagione pollutos:\n19 atque hoc modo mundus lustrabit immundum tertio et septimo die: expiatusque die septimo, lavabit et se et vestimenta sua, et immundus erit usque ad vesperum.\n20 Si quis hoc ritu non fuerit expiatus, peribit anima illius de medio ecclesi\u00e6: quia sanctuarium Domini polluit, et non est aqua lustrationis aspersus.\n21 Erit hoc pr\u00e6ceptum legitimum sempiternum. Ipse quoque qui aspergit aquas, lavabit vestimenta sua. Omnis qui tetigerit aquas expiationis, immundus erit usque ad vesperum.\n22 Quidquid tetigerit immundus, immundum faciet: et anima, qu\u00e6 horum quippiam tetigerit, immunda erit usque ad vesperum.","title":"Vulgate: Numbers: Numbers Chapter 19","type":"page"}