{"collection":"Bible & Christianity","html_url":"https://unchartedknowledge.5gfusion.net/browse/bib/vul/num020.htm","path":"bib/vul/num020.htm","source_url":"https://sacred-texts.com/bib/vul/num020.htm","text":"1 Veneruntque filii Isra\u00ebl et omnis multitudo in desertum Sin, mense primo, et mansit populus in Cades. Mortuaque est ibi Maria, et sepulta in eodem loco.\n2 Cumque indigeret aqua populus, convenerunt adversum Moysen et Aaron:\n3 et versi in seditionem, dixerunt: Utinam periissemus inter fratres nostros coram Domino.\n4 Cur eduxistis ecclesiam Domini in solitudinem, ut et nos et nostra jumenta moriamur?\n5 quare nos fecistis ascendere de \u00c6gypto, et adduxistis in locum istum pessimum, qui seri non potest, qui nec ficum gignit, nec vineas, nec malogranata, insuper et aquam non habet ad bibendum?\n6\u00a0Ingressusque Moyses et Aaron, dimissa multitudine, tabernaculum f\u0153deris, corruerunt proni in terram, clamaveruntque ad Dominum, atque dixerunt: Domine Deus, audi clamorem hujus populi, et aperi eis thesaurum tuum fontem aqu\u00e6 viv\u00e6, ut satiati, cesset murmuratio eorum. Et apparuit gloria Domini super eos.\n \n7 Locutusque est Dominus ad Moysen, dicens:\n8 Tolle virgam, et congrega populum, tu et Aaron frater tuus, et loquimini ad petram coram eis, et illa dabit aquas. Cumque eduxeris aquam de petra, bibet omnis multitudo et jumenta ejus.\n9 Tulit igitur Moyses virgam, qu\u00e6 erat in conspectu Domini, sicut pr\u00e6ceperat ei,\n10 congregata multitudine ante petram: dixitque eis: Audite, rebelles et increduli: num de petra hac vobis aquam poterimus ejicere?\n11 Cumque elevasset Moyses manum, percutiens virga bis silicem, egress\u00e6 sunt aqu\u00e6 largissim\u00e6, ita ut populus biberet et jumenta.\n12 Dixitque Dominus ad Moysen et Aaron: Quia non credidistis mihi, ut sanctificaretis me coram filiis Isra\u00ebl, non introducetis hos populos in terram, quam dabo eis.\n13\u00a0H\u00e6c est aqua contradictionis, ubi jurgati sunt filii Isra\u00ebl contra Dominum, et sanctificatus est in eis.\n \n14 Misit interea nuntios Moyses de Cades ad regem Edom, qui dicerent: H\u00e6c mandat frater tuus Isra\u00ebl: Nosti omnem laborem qui apprehendit nos,\n15 quomodo descenderint patres nostri in \u00c6gyptum, et habitaverimus ibi multo tempore, afflixerintque nos \u00c6gyptii, et patres nostros:\n16 et quomodo clamaverimus ad Dominum, et exaudierit nos, miseritque angelum, qui eduxerit nos de \u00c6gypto. Ecce in urbe Cades, qu\u00e6 est in extremis finibus tuis, positi,\n17 obsecramus ut nobis transire liceat per terram tuam. Non ibimus per agros, nec per vineas; non bibemus aquas de puteis tuis: sed gradiemur via publica, nec ad dexteram nec ad sinistram declinantes, donec transeamus terminos tuos.\n18 Cui respondit Edom: Non transibis per me, alioquin armatus occurram tibi.\n19 Dixeruntque filii Isra\u00ebl: Per tritam gradiemur viam: et si biberimus aquas tuas, nos et pecora nostra, dabimus quod justum est: nulla erit in pretio difficultas, tantum velociter transeamus.\n20 At ille respondit: Non transibis. Statimque egressus est obvius, cum infinita multitudo, et manu forti,\n21\u00a0nec voluit acquiescere deprecanti, ut concederet transitum per fines suos. Quam ob rem divertit ab eo Isra\u00ebl.\n \n22 Cumque castra movissent de Cades, venerunt in montem Hor, qui est in finibus terr\u00e6 Edom:\n23 ubi locutus est Dominus ad Moysen:\n24 Pergat, inquit, Aaron ad populos suos: non enim intrabit terram, quam dedi filiis Isra\u00ebl, eo quod incredulus fuerit ori meo, ad aquas contradictionis.\n25 Tolle Aaron et filium ejus cum eo, et duces eos in montem Hor.\n26 Cumque nudaveris patrem veste sua, indues ea Eleazarum filium ejus: Aaron colligetur, et morietur ibi.\n27 Fecit Moyses ut pr\u00e6ceperat Dominus: et ascenderunt in montem Hor coram omni multitudine.\n28 Cumque Aaron spoliasset vestibus suis, induit eis Eleazarum filium ejus.\n29 Illo mortuo in montis supercilio, descendit cum Eleazaro.\n30 Omnis autem multitudo videns occubuisse Aaron, flevit super eo triginta diebus per cunctas familias suas.","title":"Vulgate: Numbers: Numbers Chapter 20","type":"page"}