{"collection":"Bible & Christianity","html_url":"https://unchartedknowledge.5gfusion.net/browse/bib/vul/num023.htm","path":"bib/vul/num023.htm","source_url":"https://sacred-texts.com/bib/vul/num023.htm","text":"1 Dixitque Balaam ad Balac: \u00c6difica mihi hic septem aras, et para totidem vitulos, ejusdemque numeri arietes.\n2 Cumque fecisset juxta sermonem Balaam, imposuerunt simul vitulum et arietem super aram.\n3 Dixitque Balaam ad Balac: Sta paulisper juxta holocaustum tuum, donec vadam, si forte occurrat mihi Dominus, et quodcumque imperaverit, loquar tibi.\n4 Cumque abiisset velociter, occurrit illi Deus. Locutusque ad eum Balaam: Septem, inquit, aras erexi, et imposui vitulum et arietem desuper.\n5 Dominus autem posuit verbum in ore ejus, et ait: Revertere ad Balac, et h\u00e6c loqueris.\n6 Reversus invenit stantem Balac juxta holocaustum suum, et omnes principes Moabitarum:\n7\u00a0assumptaque parabola sua, dixit: [De Aram adduxit me Balac\n rex Moabitarum, de montibus orientis:\n Veni, inquit, et maledic Jacob;\n propera, et detestare Isra\u00ebl.\n8\u00a0Quomodo maledicam, cui non maledixit Deus?\n qua ratione detester, quem Dominus non detestatur?\n9\u00a0De summis silicibus videbo eum,\n et de collibus considerabo illum.\n Populus solus habitabit,\n et inter gentes non reputabitur.\n10\u00a0Quis dinumerare possit pulverem Jacob,\n et nosse numerum stirpis Isra\u00ebl?\n Moriatur anima mea morte justorum,\n et fiant novissima mea horum similia.]\n \n11 Dixitque Balac ad Balaam: Quid est hoc quod agis? ut malediceres inimicis meis vocavi te, et tu e contrario benedicis eis.\n12 Cui ille respondit: Num aliud possum loqui, nisi quod jusserit Dominus?\n13 Dixit ergo Balac: Veni mecum in alterum locum unde partem Isra\u00ebl videas, et totum videre non possis: inde maledicito ei.\n14 Cumque duxisset eum in locum sublimem, super verticem montis Phasga, \u00e6dificavit Balaam septem aras, et impositis supra vitulo atque ariete,\n15 dixit ad Balac: Sta hic juxta holocaustum tuum, donec ego obvius pergam.\n16 Cui cum Dominus occurrisset, posuissetque verbum in ore ejus, ait: Revertere ad Balac, et h\u00e6c loqueris ei.\n17 Reversus invenit eum stantem juxta holocaustum suum, et principes Moabitarum cum eo. Ad quem Balac: Quid, inquit, locutus est Dominus?\n18\u00a0At ille, assumpta parabola sua, ait: [Sta, Balac, et ausculta; audi, fili Sephor:\n19\u00a0non est Deus quasi homo, ut mentiatur,\n nec ut filius hominis, ut mutetur.\n Dixit ergo, et non faciet?\n locutus est, et non implebit?\n20\u00a0Ad benedicendum adductus sum:\n benedictionem prohibere non valeo.\n21\u00a0Non est idolum in Jacob,\n nec videtur simulacrum in Isra\u00ebl.\n Dominus Deus ejus cum eo est,\n et clangor victori\u00e6 regis in illo.\n22\u00a0Deus eduxit illum de \u00c6gypto,\n cujus fortitudo similis est rhinocerotis.\n23\u00a0Non est augurium in Jacob,\n nec divinatio in Isra\u00ebl:\n temporibus suis dicetur Jacob et Isra\u00ebli quid operatus sit Deus.\n24\u00a0Ecce populus ut le\u00e6na consurget,\n et quasi leo erigetur:\n non accubabit donec devoret pr\u00e6dam,\n et occisorum sanguinem bibat.]\n \n25 Dixitque Balac ad Balaam: Nec maledicas ei, nec benedicas.\n26 Et ille ait: Nonne dixi tibi quod quidquid mihi Deus imperaret, hoc facerem?\n27 Et ait Balac ad eum: Veni, et ducam te ad alium locum: si forte placeat Deo ut inde maledicas eis.\n28 Cumque duxisset eum super verticem montis Phogor, qui respicit solitudinem,\n29 dixit ei Balaam: \u00c6difica mihi hic septem aras, et para totidem vitulos, ejusdemque numeri arietes.\n30 Fecit Balac ut Balaam dixerat: imposuitque vitulos et arietes per singulas aras.","title":"Vulgate: Numbers: Numbers Chapter 23","type":"page"}