{"collection":"Bible & Christianity","html_url":"https://unchartedknowledge.5gfusion.net/browse/bib/vul/num024.htm","path":"bib/vul/num024.htm","source_url":"https://sacred-texts.com/bib/vul/num024.htm","text":"1 Cumque vidisset Balaam quod placeret Domino ut benediceret Isra\u00ebli, nequaquam abiit ut ante perrexerat, ut augurium qu\u00e6reret: sed dirigens contra desertum vultum suum,\n2 et elevans oculos, vidit Isra\u00ebl in tentoriis commorantem per tribus suas: et irruente in se spiritu Dei,\n3\u00a0assumpta parabola, ait: [Dixit Balaam filius Beor:\n dixit homo, cujus obturatus est oculus:\n4\u00a0dixit auditor sermonum Dei,\n qui visionem Omnipotentis intuitus est,\n qui cadit, et sic aperiuntur oculi ejus:\n5\u00a0Quam pulchra tabernacula tua, Jacob,\n et tentoria tua, Isra\u00ebl!\n6\u00a0ut valles nemoros\u00e6,\n ut horti juxta fluvios irrigui,\n ut tabernacula qu\u00e6 fixit Dominus,\n quasi cedri prope aquas.\n7\u00a0Fluet aqua de situla ejus,\n et semen illius erit in aquas multas.\n Tolletur propter Agag, rex ejus,\n et auferetur regnum illius.\n8\u00a0Deus eduxit illum de \u00c6gypto,\n cujus fortitudo similis est rhinocerotis.\n Devorabunt gentes hostes illius,\n ossaque eorum confringent, et perforabunt sagittis.\n9\u00a0Accubans dormivit ut leo,\n et quasi le\u00e6na, quam suscitare nullus audebit.\n Qui benedixerit tibi, erit et ipse benedictus:\n qui maledixerit, in maledictione reputabitur.]\n \n10 Iratusque Balac contra Balaam, complosis manibus ait: Ad maledicendum inimicis meis vocavi te, quibus e contrario tertio benedixisti:\n11 revertere ad locum tuum. Decreveram quidem magnifice honorare te, sed Dominus privavit te honore disposito.\n12 Respondit Balaam ad Balac: Nonne nuntiis tuis, quos misisti ad me, dixi:\n13 Si dederit mihi Balac plenam domum suam argenti et auri, non potero pr\u00e6terire sermonem Domini Dei mei, ut vel boni quid vel mali proferam ex corde meo: sed quidquid Dominus dixerit, hoc loquar?\n14 verumtamen pergens ad populum meum, dabo consilium, quid populus tuus populo huic faciat extremo tempore.\n15\u00a0Sumpta igitur parabola, rursum ait: [Dixit Balaam filius Beor:\n dixit homo, cujus obturatus est oculus:\n16\u00a0dixit auditor sermonum Dei,\n qui novit doctrinam Altissimi,\n et visiones Omnipotentis videt,\n qui cadens apertos habet oculos:\n17\u00a0Videbo eum, sed non modo:\n intuebor illum, sed non prope.\n Orietur stella ex Jacob,\n et consurget virga de Isra\u00ebl:\n et percutiet duces Moab,\n vastabitque omnes filios Seth.\n18\u00a0Et erit Idum\u00e6a possessio ejus:\n h\u00e6reditas Seir cedet inimicis suis:\n Isra\u00ebl vero fortiter aget.\n19\u00a0De Jacob erit qui dominetur,\n et perdat reliquias civitatis.\n]\n20\u00a0Cumque vidisset Amalec, assumens parabolam, ait: [Principium gentium Amalec,\n cujus extrema perdentur.]\n21\u00a0Vidit quoque Cin\u00e6um: et assumpta parabola, ait: [Robustum quidem est habitaculum tuum:\n sed si in petra posueris nidum tuum,\n22\u00a0et fueris electus de stirpe Cin,\n quamdiu poteris permanere? Assur enim capiet te.]\n23\u00a0Assumptaque parabola iterum locutus est: [Heu! quis victurus est,\n quando ista faciet Deus?\n24\u00a0Venient in trieribus de Italia:\n superabunt Assyrios, vastabuntque Hebr\u00e6os, et ad extremum etiam ipsi peribunt.]\n25 Surrexitque Balaam, et reversus est in locum suum: Balac quoque via, qua venerat, rediit.","title":"Vulgate: Numbers: Numbers Chapter 24","type":"page"}