{"collection":"Bible & Christianity","html_url":"https://unchartedknowledge.5gfusion.net/browse/bib/vul/num026.htm","path":"bib/vul/num026.htm","source_url":"https://sacred-texts.com/bib/vul/num026.htm","text":"1 Postquam noxiorum sanguis effusus est, dixit Dominus ad Moysen et Eleazarum filium Aaron sacerdotem:\n2 Numerate omnem summam filiorum Isra\u00ebl a viginti annis et supra, per domos et cognationes suas, cunctos qui possunt ad bella procedere.\n3 Locuti sunt itaque Moyses et Eleazar sacerdos, in campestribus Moab super Jordanem contra Jericho, ad eos qui erant\n4 a viginti annis et supra, sicut Dominus imperaverat, quorum iste est numerus.\n5 Ruben primogenitus Isra\u00ebl: hujus filius, Henoch, a quo familia Henochitarum: et Phallu, a quo familia Phalluitarum:\n6 et Hesron, a quo familia Hesronitarum: et Charmi, a quo familia Charmitarum.\n7 H\u00e6 sunt famili\u00e6 de stirpe Ruben: quarum numerus inventus est quadraginta tria millia, et septingenti triginta.\n8 Filius Phallu, Eliab:\n9 hujus filii, Namuel et Dathan et Abiron: isti sunt Dathan et Abiron principes populi, qui surrexerunt contra Moysen et Aaron in seditione Core, quando adversus Dominum rebellaverunt:\n10 et aperiens terra os suum devoravit Core, morientibus plurimis, quando combussit ignis ducentos quinquaginta viros. Et factum est grande miraculum,\n11 ut, Core pereunte, filii illius non perirent.\n12 Filii Simeon per cognationes suas: Namuel, ab hoc familia Namuelitarum: Jamin, ab hoc familia Jaminitarum: Jachin, ab hoc familia Jachinitarum:\n13 Zare, ab hoc familia Zareitarum: Saul, ab hoc familia Saulitarum.\n14 H\u00e6 sunt famili\u00e6 de stirpe Simeon, quarum omnis numerus fuit viginti duo millia ducenti.\n15 Filii Gad per cognationes suas: Sephon, ab hoc familia Sephonitarum: Aggi, ab hoc familia Aggitarum: Suni, ab hoc familia Sunitarum:\n16 Ozni, ab hoc familia Oznitarum: Her, ab hoc familia Heritarum:\n17 Arod, ab hoc familia Aroditarum: Ariel, ab hoc familia Arielitarum.\n18 Ist\u00e6 sunt famili\u00e6 Gad, quarum omnis numerus fuit quadraginta millia quingenti.\n19 Filii Juda, Her et Onan, qui ambo mortui sunt in terra Chanaan.\n20 Fueruntque filii Juda per cognationes suas: Sela, a quo familia Selaitarum: Phares, a quo familia Pharesitarum: Zare, a quo familia Zareitarum.\n21 Porro filii Phares: Hesron, a quo familia Hesronitarum: et Hamul, a quo familia Hamulitarum.\n22 Ist\u00e6 sunt famili\u00e6 Juda, quarum omnis numerus fuit septuaginta sex millia quingenti.\n23 Filii Issachar per cognationes suas: Thola, a quo familia Tholaitarum: Phua, a quo familia Phuaitarum:\n24 Jasub, a quo familia Jasubitarum: Semran, a quo familia Semranitarum.\n25 H\u00e6 sunt cognationes Issachar, quarum numerus fuit sexaginta quatuor millia trecenti.\n26 Filii Zabulon per cognationes suas: Sared, a quo familia Sareditarum: Elon, a quo familia Elonitarum: Jalel, a quo familia Jalelitarum.\n27 H\u00e6 sunt cognationes Zabulon, quarum numerus fuit sexaginta millia quingenti.\n28 Filii Joseph per cognationes suas, Manasse et Ephraim.\n29 De Manasse ortus est Machir, a quo familia Machiritarum. Machir genuit Galaad, a quo familia Galaaditarum.\n30 Galaad habuit filios: Jezer, a quo familia Jezeritarum: et Helec, a quo familia Helecitarum:\n31 et Asriel, a quo familia Asrielitarum: et Sechem, a quo familia Sechemitarum:\n32 et Semida, a quo familia Semidaitarum: et Hepher, a quo familia Hepheritarum.\n33 Fuit autem Hepher pater Salphaad, qui filios non habebat, sed tantum filias: quarum ista sunt nomina: Maala, et Noa, et Hegla, et Melcha, et Thersa.\n34 H\u00e6 sunt famili\u00e6 Manasse, et numerus earum quinquaginta duo millia septingenti.\n35 Filii autem Ephraim per cognationes suas fuerunt hi: Suthala, a quo familia Suthalaitarum: Becher, a quo familia Becheritarum: Thehen, a quo familia Thehenitarum.\n36 Porro filius Suthala fuit Heran, a quo familia Heranitarum.\n37 H\u00e6 sunt cognationes filiorum Ephraim: quarum numerus fuit triginta duo millia quingenti.\n38 Isti sunt filii Joseph per familias suas. Filii Benjamin in cognationibus suis: Bela, a quo familia Belaitarum: Asbel, a quo familia Asbelitarum: Ahiram, a quo familia Ahiramitarum:\n39 Supham, a quo familia Suphamitarum: Hupham, a quo familia Huphamitarum.\n40 Filii Bela: Hered, et No\u00ebman. De Hered, familia Hereditarum: de No\u00ebman, familia No\u00ebmanitarum.\n41 Hi sunt filii Benjamin per cognationes suas: quorum numerus fuit quadraginta quinque millia sexcenti.\n42 Filii Dan per cognationes suas: Suham, a quo familia Suhamitarum. H\u00e6 sunt cognationes Dan per familias suas.\n43 Omnes fuere Suhamit\u00e6, quorum numerus erat sexaginta quatuor millia quadringenti.\n44 Filii Aser per cognationes suas: Jemna, a quo familia Jemnaitarum: Jessui, a quo familia Jessuitarum: Brie, a quo familia Brieitarum.\n45 Filii Brie: Heber, a quo familia Heberitarum: et Melchiel, a quo familia Melchielitarum.\n46 Nomen autem fili\u00e6 Aser fuit Sara.\n47 H\u00e6 cognationes filiorum Aser, et numerus eorum quinquaginta tria millia quadringenti.\n48 Filii Nephthali per cognationes suas: Jesiel, a quo familia Jesielitarum: Guni, a quo familia Gunitarum:\n49 Jeser, a quo familia Jeseritarum: Sellem, a quo familia Sellemitarum.\n50 H\u00e6 sunt cognationes filiorum Nephthali per familias suas: quorum numerus quadraginta quinque millia quadringenti.\n51 Ista est summa filiorum Isra\u00ebl, qui recensiti sunt, sexcenta millia, et mille septingenti triginta.\n52 Locutusque est Dominus ad Moysen, dicens:\n53 Istis dividetur terra juxta numerum vocabulorum in possessiones suas.\n54 Pluribus majorem partem dabis, et paucioribus minorem: singulis, sicut nunc recensiti sunt, tradetur possessio:\n55 ita dumtaxat ut sors terram tribubus dividat et familiis.\n56\u00a0Quidquid sorte contigerit, hoc vel plures accipiant, vel pauciores.\n \n57 Hic quoque est numerus filiorum Levi per familias suas: Gerson, a quo familia Gersonitarum: Caath, a quo familia Caathitarum: Merari, a quo familia Meraritarum.\n58 H\u00e6 sunt famili\u00e6 Levi: familia Lobni, familia Hebroni, familia Moholi, familia Musi, familia Core. At vero Caath genuit Amram:\n59 qui habuit uxorem Jochabed filiam Levi, qu\u00e6 nata est ei in \u00c6gypto. H\u00e6c genuit Amram viro suo filios, Aaron, et Moysen, et Mariam sororem eorum.\n60 De Aaron orti sunt Nadab et Abiu, et Eleazar et Ithamar:\n61 quorum Nadab et Abiu mortui sunt, cum obtulissent ignem alienum coram Domino.\n62 Fueruntque omnes qui numerati sunt, viginti tria millia generis masculini ab uno mense et supra: quia non sunt recensiti inter filios Isra\u00ebl, nec eis cum ceteris data possessio est.\n63 Hic est numerus filiorum Isra\u00ebl, qui descripti sunt a Moyse et Eleazaro sacerdote, in campestribus Moab supra Jordanem contra Jericho:\n64 inter quos, nullus fuit eorum qui ante numerati sunt a Moyse et Aaron in deserto Sinai:\n65 pr\u00e6dixerat enim Dominus quod omnes morerentur in solitudine. Nullusque remansit ex eis, nisi Caleb filius Jephone, et Josue filius Nun.","title":"Vulgate: Numbers: Numbers Chapter 26","type":"page"}