{"collection":"Bible & Christianity","html_url":"https://unchartedknowledge.5gfusion.net/browse/bib/vul/num033.htm","path":"bib/vul/num033.htm","source_url":"https://sacred-texts.com/bib/vul/num033.htm","text":"1 H\u00e6 sunt mansiones filiorum Isra\u00ebl, qui egressi sunt de \u00c6gypto per turmas suas in manu Moysi et Aaron,\n2 quas descripsit Moyses juxta castrorum loca, qu\u00e6 Domini jussione mutabant.\n3 Profecti igitur de Ramesse mense primo, quintadecima die mensis primi, altera die Phase, filii Isra\u00ebl in manu excelsa, videntibus cunctis \u00c6gyptiis,\n4 et sepelientibus primogenitos, quos percusserat Dominus (nam et in diis eorum exercuerat ultionem),\n5 castrametati sunt in Soccoth.\n6 Et de Soccoth venerunt in Etham, qu\u00e6 est in extremis finibus solitudinis.\n7 Inde egressi venerunt contra Phihahiroth, qu\u00e6 respicit Beelsephon, et castrametati sunt ante Magdalum.\n8 Profectique de Phihahiroth, transierunt per medium mare in solitudinem: et ambulantes tribus diebus per desertum Etham, castrametati sunt in Mara.\n9 Profectique de Mara, venerunt in Elim, ubi erant duodecim fontes aquarum, et palm\u00e6 septuaginta: ibique castrametati sunt.\n10 Sed et inde egressi, fixerunt tentoria super mare Rubrum. Profectique de mari Rubro,\n11 castrametati sunt in deserto Sin.\n12 Unde egressi, venerunt in Daphca.\n13 Profectique de Daphca, castrametati sunt in Alus.\n14 Egressique de Alus, in Raphidim fixere tentoria, ubi populo defuit aqua ad bibendum.\n15 Profectique de Raphidim, castrametati sunt in deserto Sinai.\n16 Sed et de solitudine Sinai egressi, venerunt ad sepulchra concupiscenti\u00e6.\n17 Profectique de sepulchris concupiscenti\u00e6, castrametati sunt in Haseroth.\n18 Et de Haseroth venerunt in Rethma.\n19 Profectique de Rethma, castrametati sunt in Remmomphares.\n20 Unde egressi venerunt in Lebna.\n21 De Lebna castrametati sunt in Ressa.\n22 Egressique de Ressa, venerunt in Ceelatha.\n23 Unde profecti, castrametati sunt in monte Sepher.\n24 Egressi de monte Sepher, venerunt in Arada.\n25 Inde proficiscentes, castrametati sunt in Maceloth.\n26 Profectique de Maceloth, venerunt in Thahath.\n27 De Thahath, castrametati sunt in Thare.\n28 Unde egressi, fixere tentoria in Methca.\n29 Et de Methca, castrametati sunt in Hesmona.\n30 Profectique de Hesmona, venerunt in Moseroth.\n31 Et de Moseroth, castrametati sunt in Benejaacan.\n32 Profectique de Benejaacan, venerunt in montem Gadgad.\n33 Unde profecti, castrametati sunt in Jetebatha.\n34 Et de Jetebatha venerunt in Hebrona.\n35 Egressique de Hebrona, castrametati sunt in Asiongaber.\n36 Inde profecti, venerunt in desertum Sin, h\u00e6c est Cades.\n37 Egressique de Cades, castrametati sunt in monte Hor, in extremis finibus terr\u00e6 Edom.\n38 Ascenditque Aaron sacerdos in montem Hor jubente Domino: et ibi mortuus est anno quadragesimo egressionis filiorum Isra\u00ebl ex \u00c6gypto, mense quinto, prima die mensis,\n39 cum esset annorum centum viginti trium.\n40 Audivitque Chanan\u00e6us rex Arad, qui habitabat ad meridiem, in terram Chanaan venisse filios Isra\u00ebl.\n41 Et profecti de monte Hor, castrametati sunt in Salmona.\n42 Unde egressi, venerunt in Phunon.\n43 Profectique de Phunon, castrametati sunt in Oboth.\n44 Et de Oboth venerunt in Ijeabarim, qu\u00e6 est in finibus Moabitarum.\n45 Profectique de Ijeabarim, fixere tentoria in Dibongad.\n46 Unde egressi, castrametati sunt in Helmondeblathaim.\n47 Egressique de Helmondeblathaim, venerunt ad montes Abarim contra Nabo.\n48 Profectique de montibus Abarim, transierunt ad campestria Moab, supra Jordanem, contra Jericho.\n49\u00a0Ibique castrametati sunt de Bethsimoth usque ad Abelsatim in planioribus locis Moabitarum.\n \n50 Ubi locutus est Dominus ad Moysen:\n51 Pr\u00e6cipe filiis Isra\u00ebl, et dic ad eos: Quando transieritis Jordanem, intrantes terram Chanaan,\n52 disperdite cunctos habitatores terr\u00e6 illius: confringite titulos, et statuas comminuite, atque omnia excelsa vastate,\n53 mundantes terram, et habitantes in ea. Ego enim dedi vobis illam in possessionem,\n54 quam dividetis vobis sorte. Pluribus dabitis latiorem, et paucis angustiorem. Singulis ut sors ceciderit, ita tribuetur h\u00e6reditas. Per tribus et familias possessio dividetur.\n55 Sin autem nolueritis interficere habitatores terr\u00e6: qui remanserint, erunt vobis quasi clavi in oculis, et lance\u00e6 in lateribus, et adversabuntur vobis in terra habitationis vestr\u00e6:\n56 et quidquid illis cogitaveram facere, vobis faciam.","title":"Vulgate: Numbers: Numbers Chapter 33","type":"page"}