{"collection":"Bible & Christianity","html_url":"https://unchartedknowledge.5gfusion.net/browse/bib/vul/num034.htm","path":"bib/vul/num034.htm","source_url":"https://sacred-texts.com/bib/vul/num034.htm","text":"1 Locutusque est Dominus ad Moysen, dicens:\n2 Pr\u00e6cipe filiis Isra\u00ebl, et dices ad eos: Cum ingressi fueritis terram Chanaan, et in possessionem vobis sorte ceciderit, his finibus terminabitur.\n3 Pars meridiana incipiet a solitudine Sin, qu\u00e6 est juxta Edom: et habebit terminos contra orientem mare salsissimum.\n4 Qui circuibunt australem plagam per ascensum Scorpionis, ita ut transeant in Senna, et perveniant a meridie usque ad Cadesbarne, unde egredientur confinia ad villam nomine Adar, et tendent usque ad Asemona.\n5 Ibitque per gyrum terminus ab Asemona usque ad torrentem \u00c6gypti, et maris magni littore finietur.\n6 Plaga autem occidentalis a mari magno incipiet, et ipso fine claudetur.\n7 Porro ad septentrionalem plagam a mari magno termini incipient, pervenientes usque ad montem altissimum,\n8 a quo venient in Emath usque ad terminos Sedada:\n9 ibuntque confinia usque ad Zephrona, et villam Enan. Hi erunt termini in parte aquilonis.\n10 Inde metabuntur fines contra orientalem plagam de villa Enan usque Sephama,\n11 et de Sephama descendent termini in Rebla contra fontem Daphnim: inde pervenient contra orientem ad mare Cenereth,\n12\u00a0et tendent usque ad Jordanem, et ad ultimum salsissimo claudentur mari. Hanc habebitis terram per fines suos in circuitu.\n \n13 Pr\u00e6cepitque Moyses filiis Isra\u00ebl, dicens: H\u00e6c erit terra, quam possidebitis sorte, et quam jussit Dominus dari novem tribubus, et dimidi\u00e6 tribui.\n14 Tribus enim filiorum Ruben per familias suas, et tribus filiorum Gad juxta cognationum numerum, media quoque tribus Manasse,\n15 id est, du\u00e6 semis tribus, acceperunt partem suam trans Jordanem contra Jericho ad orientalem plagam.\n16 Et ait Dominus ad Moysen:\n17 H\u00e6c sunt nomina virorum qui terram vobis divident, Eleazar sacerdos, et Josue filius Nun,\n18 et singuli principes de tribubus singulis,\n19 quorum ista sunt vocabula. De tribu Juda, Caleb filius Jephone.\n20 De tribu Simeon, Samuel filius Ammiud.\n21 De tribu Benjamin, Elidad filius Chaselon.\n22 De tribu filiorum Dan, Bocci filius Jogli.\n23 Filiorum Joseph de tribu Manasse, Hanniel filius Ephod.\n24 De tribu Ephraim, Camuel filius Sephthan.\n25 De tribu Zabulon, Elisaphan filius Pharnach.\n26 De tribu Issachar, dux Phaltiel filius Ozan.\n27 De tribu Aser, Ahiud filius Salomi.\n28 De tribu Nephthali, Pheda\u00ebl filius Ammiud.\n29 Hi sunt, quibus pr\u00e6cepit Dominus ut dividerent filiis Isra\u00ebl terram Chanaan.","title":"Vulgate: Numbers: Numbers Chapter 34","type":"page"}