{"collection":"Bible & Christianity","html_url":"https://unchartedknowledge.5gfusion.net/browse/bib/vul/oba001.htm","path":"bib/vul/oba001.htm","source_url":"https://sacred-texts.com/bib/vul/oba001.htm","text":"1\u00a0Visio Abdi\u00e6. [H\u00e6c dicit Dominus Deus ad Edom:\n Auditum audivimus a Domino,\n et legatum ad gentes misit:\n surgite, et consurgamus adversus eum in pr\u00e6lium.\n2\u00a0Ecce parvulum dedi te in gentibus:\n contemptibilis tu es valde.\n3\u00a0Superbia cordis tui extulit te,\n habitantem in scissuris petrarum,\n exaltantem solium tuum;\n qui dicis in corde tuo:\n Quis detrahet me in terram?\n4\u00a0Si exaltatus fueris ut aquila,\n et si inter sidera posueris nidum tuum,\n inde detraham te, dicit Dominus.\n5\u00a0Si fures introissent ad te,\n si latrones per noctem,\n quomodo conticuisses?\n nonne furati essent sufficientia sibi?\n Si vindemiatores introissent ad te,\n numquid saltem racemum reliquissent tibi?\n6\u00a0Quomodo scrutati sunt Esau;\n investigaverunt abscondita ejus?\n7\u00a0Usque ad terminum emiserunt te:\n omnes viri f\u0153deris tui illuserunt tibi:\n invaluerunt adversum te viri pacis tu\u00e6,\n qui comedunt tecum, ponent insidias subter te;\n non est prudentia in eo.\n8\u00a0Numquid non in die illa, dicit Dominus,\n perdam sapientes de Idum\u00e6a,\n et prudentiam de monte Esau?\n9\u00a0Et timebunt fortes tui a meridie,\n ut intereat vir de monte Esau.\n10\u00a0Propter interfectionem,\n et propter iniquitatem in fratrem tuum Jacob,\n operiet te confusio, et peribis in \u00e6ternum.\n11\u00a0In die cum stares adversus eum,\n quando capiebant alieni exercitum ejus,\n et extranei ingrediebantur portas ejus,\n et super Jerusalem mittebant sortem,\n tu quoque eras quasi unus ex eis.\n12\u00a0Et non despicies in die fratris tui,\n in die peregrinationis ejus:\n et non l\u00e6taberis super filios Juda\n in die perditionis eorum:\n et non magnificabis os tuum\n in die angusti\u00e6.\n13\u00a0Neque ingredieris portam populi mei\n in die ruin\u00e6 eorum;\n neque despicies et tu in malis ejus\n in die vastitatis illius.\n Et non emitteris adversus exercitum ejus\n in die vastitatis illius,\n14\u00a0neque stabis in exitibus\n ut interficias eos qui fugerint,\n et non concludes reliquos ejus\n in die tribulationis.\n15\u00a0Quoniam juxta est dies Domini super omnes gentes:\n sicut fecisti, fiet tibi;\n retributionem tuam convertet in caput tuum.\n16\u00a0Quomodo enim bibistis super montem sanctum meum,\n bibent omnes gentes jugiter:\n et bibent, et absorbebunt,\n et erunt quasi non sint.\n \n17\u00a0Et in monte Sion erit salvatio, et erit sanctus;\n et possidebit domus Jacob eos qui se possederant.\n18\u00a0Et erit domus Jacob ignis,\n et domus Joseph flamma,\n et domus Esau stipula:\n et succendentur in eis, et devorabunt eos,\n et non erunt reliqui\u00e6 domus Esau,\n quia Dominus locutus est.\n19\u00a0Et h\u00e6reditabunt hi, qui ad austrum sunt, montem Esau,\n et qui in campestribus, Philisthiim:\n et possidebunt regionem Ephraim et regionem Samari\u00e6,\n et Benjamin possidebit Galaad.\n20\u00a0Et transmigratio exercitus hujus filiorum Isra\u00ebl,\n omnia loca Chanan\u00e6orum usque ad Sareptam:\n et transmigratio Jerusalem, qu\u00e6 in Bosphoro est,\n possidebit civitates austri.\n21\u00a0Et ascendent salvatores in montem Sion judicare montem Esau,\n et erit Domino regnum.]","title":"Vulgate: Obadiah: Obadiah Chapter 1","type":"page"}