{"collection":"Bible & Christianity","html_url":"https://unchartedknowledge.5gfusion.net/browse/bib/vul/pe1001.htm","path":"bib/vul/pe1001.htm","source_url":"https://sacred-texts.com/bib/vul/pe1001.htm","text":"1 Petrus Apostolus Jesu Christi, electis advenis dispersionis Ponti, Galati\u00e6, Cappadoci\u00e6, Asi\u00e6, et Bithyni\u00e6,\n2\u00a0secundum pr\u00e6scientiam Dei Patris, in sanctificationem Spiritus, in obedientiam, et aspersionem sanguinis Jesu Christi. Gratia vobis, et pax multiplicetur.\n \n3 Benedictus Deus et Pater Domini nostri Jesu Christi, qui secundum misericordiam suam magnam regeneravit nos in spem vivam, per resurrectionem Jesu Christi ex mortuis,\n4 in h\u00e6reditatem incorruptibilem, et incontaminatam, et immarcescibilem, conservatam in c\u00e6lis in vobis,\n5 qui in virtute Dei custodimini per fidem in salutem, paratam revelari in tempore novissimo.\n6 In quo exsultabis, modicum nunc si oportet contristari in variis tentationibus:\n7 ut probatio vestr\u00e6 fidei multo pretiosior auro (quod per ignem probatur) inveniatur in laudem, et gloriam, et honorem in revelatione Jesu Christi:\n8 quem cum non videritis, diligitis: in quem nunc quoque non videntes creditis: credentes autem exsultabitis l\u00e6titia inenarrabili, et glorificata:\n9 reportantes finem fidei vestr\u00e6, salutem animarum.\n10 De qua salute exquisierunt, atque scrutati sunt prophet\u00e6, qui de futura in vobis gratia prophetaverunt:\n11 scrutantes in quod vel quale tempus significaret in eis Spiritus Christi: pr\u00e6nuntians eas qu\u00e6 in Christo sunt passiones, et posteriores glorias:\n12\u00a0quibus revelatum est quia non sibimetipsis, vobis autem ministrabant ea qu\u00e6 nunc nuntiata sunt vobis per eos qui evangelizaverunt vobis, Spiritu Sancto misso de c\u00e6lo, in quem desiderant angeli prospicere.\n \n13 Propter quod succincti lumbos mentis vestr\u00e6, sobrii, perfecte sperate in eam, qu\u00e6 offertur vobis, gratiam, in revelationem Jesu Christi:\n14 quasi filii obedienti\u00e6, non configurati prioribus ignoranti\u00e6 vestr\u00e6 desideriis:\n15 sed secundum eum qui vocavit vos, Sanctum: et ipsi in omni conversatione sancti sitis:\n16 quoniam scriptum est: Sancti eritis, quoniam ego sanctus sum.\n17 Et si patrem invocatis eum, qui sine acceptione personarum judicat secundum uniuscujusque opus, in timore incolatus vestri tempore conversamini.\n18 Scientes quod non corruptibilibus, auro vel argento, redempti estis de vana vestra conversatione patern\u00e6 traditionis:\n19 sed pretioso sanguine quasi agni immaculati Christi, et incontaminati:\n20 pr\u00e6cogniti quidem ante mundi constitutionem, manifestati autem novissimis temporibus propter vos,\n21 qui per ipsum fideles estis in Deo, qui suscitavit eum a mortuis, et dedit ei gloriam, ut fides vestra et spes esset in Deo:\n22 animas vestras castificantes in obedientia caritatis, in fraternitatis amore, simplici ex corde invicem diligite attentius:\n23 renati non ex semine corruptibili, sed incorruptibili per verbum Dei vivi, et permanentis in \u00e6ternum:\n24 quia omnis caro ut f\u0153num: et omnis gloria ejus tamquam flos f\u0153ni: exaruit f\u0153num, et flos ejus decidit.\n25 Verbum autem Domini manet in \u00e6ternum: hoc est autem verbum, quod evangelizatum est in vos.","title":"Vulgate: 1 Peter: 1 Peter Chapter 1","type":"page"}