{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro001.htm","path":"bib/vul/pro001.htm","source_url":"https://sacred-texts.com/bib/vul/pro001.htm","text":"1\u00a0[Parabol\u00e6 Salomonis, filii David, regis Isra\u00ebl,\n2\u00a0ad sciendam sapientiam et disciplinam;\n3\u00a0ad intelligenda verba prudenti\u00e6,\n et suscipiendam eruditionem doctrin\u00e6,\n justitiam, et judicium, et \u00e6quitatem:\n4\u00a0ut detur parvulis astutia,\n adolescenti scientia et intellectus.\n5\u00a0Audiens sapiens, sapientior erit,\n et intelligens gubernacula possidebit.\n6\u00a0Animadvertet parabolam et interpretationem,\n verba sapientum et \u00e6nigmata eorum.\n7\u00a0Timor Domini principium sapienti\u00e6;\n sapientiam atque doctrinam stulti despiciunt.]\n \n8\u00a0[Audi, fili mi, disciplinam patris tui,\n et ne dimittas legem matris tu\u00e6:\n9\u00a0ut addatur gratia capiti tuo,\n et torques collo tuo.\n10\u00a0Fili mi, si te lactaverint peccatores,\n ne acquiescas eis.\n11\u00a0Si dixerint: Veni nobiscum, insidiemur sanguini;\n abscondamus tendiculas contra insontem frustra;\n12\u00a0deglutiamus eum sicut infernus viventem,\n et integrum quasi descendentem in lacum;\n13\u00a0omnem pretiosam substantiam reperiemus;\n implebimus domos nostras spoliis:\n14\u00a0sortem mitte nobiscum,\n marsupium unum sit omnium nostrum:\n15\u00a0fili mi, ne ambules cum eis;\n prohibe pedem tuum a semitis eorum:\n16\u00a0pedes enim illorum ad malum currunt,\n et festinant ut effundant sanguinem.\n17\u00a0Frustra autem jacitur rete\n ante oculos pennatorum.\n18\u00a0Ipsi quoque contra sanguinem suum insidiantur,\n et moliuntur fraudes contra animas suas.\n19\u00a0Sic semit\u00e6 omnis avari:\n animas possidentium rapiunt.]\n \n20\u00a0[Sapientia foris pr\u00e6dicat;\n in plateis dat vocem suam:\n21\u00a0in capite turbarum clamitat;\n in foribus portarum urbis profert verba sua, dicens:\n22\u00a0Usquequo, parvuli, diligitis infantiam,\n et stulti ea qu\u00e6 sibi sunt noxia cupient,\n et imprudentes odibunt scientiam?\n23\u00a0convertimini ad correptionem meam.\n En proferam vobis spiritum meum,\n et ostendam vobis verba mea.\n24\u00a0Quia vocavi, et renuistis;\n extendi manum meam, et non fuit qui aspiceret:\n25\u00a0despexistis omne consilium meum,\n et increpationes meas neglexistis.\n26\u00a0Ego quoque in interitu vestro ridebo,\n et subsannabo cum vobis id quod timebatis advenerit.\n27\u00a0Cum irruerit repentina calamitas,\n et interitus quasi tempestas ingruerit;\n quando venerit super vos tribulatio et angustia:\n28\u00a0tunc invocabunt me, et non exaudiam;\n mane consurgent, et non invenient me:\n29\u00a0eo quod exosam habuerint disciplinam,\n et timorem Domini non susceperint,\n30\u00a0nec acquieverint consilio meo,\n et detraxerint univers\u00e6 correptioni me\u00e6.\n31\u00a0Comedent igitur fructus vi\u00e6 su\u00e6,\n suisque consiliis saturabuntur.\n32\u00a0Aversio parvulorum interficiet eos,\n et prosperitas stultorum perdet illos.\n33\u00a0Qui autem me audierit, absque terrore requiescet,\n et abundantia perfruetur, timore malorum sublato.]","title":"Vulgate: Proverbs: Proverbs Chapter 1","type":"page"}