{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro002.htm","path":"bib/vul/pro002.htm","source_url":"https://sacred-texts.com/bib/vul/pro002.htm","text":"1\u00a0[Fili mi, si susceperis sermones meos,\n et mandata mea absconderis penes te:\n2\u00a0ut audiat sapientiam auris tua,\n inclina cor tuum ad cognoscendam prudentiam.\n3\u00a0Si enim sapientiam invocaveris,\n et inclinaveris cor tuum prudenti\u00e6;\n4\u00a0si qu\u00e6sieris eam quasi pecuniam,\n et sicut thesauros effoderis illam:\n5\u00a0tunc intelliges timorem Domini,\n et scientiam Dei invenies,\n6\u00a0quia Dominus dat sapientiam,\n et ex ore ejus prudentia et scientia.\n7\u00a0Custodiet rectorum salutem,\n et proteget gradientes simpliciter,\n8\u00a0servans semitas justiti\u00e6,\n et vias sanctorum custodiens.\n9\u00a0Tunc intelliges justitiam, et judicium,\n et \u00e6quitatem, et omnem semitam bonam.]\n \n10\u00a0[Si intraverit sapientia cor tuum,\n et scientia anim\u00e6 tu\u00e6 placuerit,\n11\u00a0consilium custodiet te,\n et prudentia servabit te:\n12\u00a0ut eruaris a via mala,\n et ab homine qui perversa loquitur;\n13\u00a0qui relinquunt iter rectum,\n et ambulant per vias tenebrosas;\n14\u00a0qui l\u00e6tantur cum malefecerint,\n et exsultant in rebus pessimis;\n15\u00a0quorum vi\u00e6 pervers\u00e6 sunt,\n et infames gressus eorum.\n16\u00a0Ut eruaris a muliere aliena,\n et ab extranea qu\u00e6 mollit sermones suos,\n17\u00a0et relinquit ducem pubertatis su\u00e6,\n18\u00a0et pacti Dei sui oblita est.\n Inclinata est enim ad mortem domus ejus,\n et ad inferos semit\u00e6 ipsius.\n19\u00a0Omnes qui ingrediuntur ad eam non revertentur,\n nec apprehendent semitas vit\u00e6.\n20\u00a0Ut ambules in via bona,\n et calles justorum custodias:\n21\u00a0qui enim recti sunt habitabunt in terra,\n et simplices permanebunt in ea;\n22\u00a0impii vero de terra perdentur,\n et qui inique agunt auferentur ex ea.]","title":"Vulgate: Proverbs: Proverbs Chapter 2","type":"page"}