{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro003.htm","path":"bib/vul/pro003.htm","source_url":"https://sacred-texts.com/bib/vul/pro003.htm","text":"1\u00a0[Fili mi, ne obliviscaris legis me\u00e6,\n et pr\u00e6cepta mea cor tuum custodiat:\n2\u00a0longitudinem enim dierum, et annos vit\u00e6, et pacem,\n apponent tibi.\n3\u00a0Misericordia et veritas te non deserant;\n circumda eas gutturi tuo,\n et describe in tabulis cordis tui:\n4\u00a0et invenies gratiam, et disciplinam bonam,\n coram Deo et hominibus.\n5\u00a0Habe fiduciam in Domino ex toto corde tuo,\n et ne innitaris prudenti\u00e6 tu\u00e6.\n6\u00a0In omnibus viis tuis cogita illum,\n et ipse diriget gressus tuos.\n7\u00a0Ne sis sapiens apud temetipsum;\n time Deum, et recede a malo:\n8\u00a0sanitas quippe erit umbilico tuo,\n et irrigatio ossium tuorum.\n9\u00a0Honora Dominum de tua substantia,\n et de primitiis omnium frugum tuarum da ei:\n10\u00a0et implebuntur horrea tua saturitate,\n et vino torcularia tua redundabunt.]\n \n11\u00a0[Disciplinam Domini, fili mi, ne abjicias,\n nec deficias cum ab eo corriperis:\n12\u00a0quem enim diligit Dominus, corripit,\n et quasi pater in filio complacet sibi.\n13\u00a0Beatus homo qui invenit sapientiam,\n et qui affluit prudentia.\n14\u00a0Melior est acquisitio ejus negotiatione argenti,\n et auri primi et purissimi fructus ejus.\n15\u00a0Pretiosior est cunctis opibus,\n et omnia qu\u00e6 desiderantur huic non valent comparari.\n16\u00a0Longitudo dierum in dextera ejus,\n et in sinistra illius diviti\u00e6 et gloria.\n17\u00a0Vi\u00e6 ejus vi\u00e6 pulchr\u00e6,\n et omnes semit\u00e6 illius pacific\u00e6.\n18\u00a0Lignum vit\u00e6 est his qui apprehenderint eam,\n et qui tenuerit eam beatus.\n19\u00a0Dominus sapientia fundavit terram;\n stabilivit c\u00e6los prudentia.\n20\u00a0Sapientia illius eruperunt abyssi,\n et nubes rore concrescunt.]\n \n21\u00a0[Fili mi, ne effluant h\u00e6c ab oculis tuis.\n Custodi legem atque consilium,\n22\u00a0et erit vita anim\u00e6 tu\u00e6,\n et gratia faucibus tuis.\n23\u00a0Tunc ambulabis fiducialiter in via tua,\n et pes tuus non impinget.\n24\u00a0Si dormieris, non timebis;\n quiesces, et suavis erit somnus tuus.\n25\u00a0Ne paveas repentino terrore,\n et irruentes tibi potentias impiorum.\n26\u00a0Dominus enim erit in latere tuo,\n et custodiet pedem tuum, ne capiaris.]\n \n27\u00a0[Noli prohibere benefacere eum qui potest:\n si vales, et ipse benefac.\n28\u00a0Ne dicas amico tuo: Vade, et revertere: cras dabo tibi:\n cum statim possis dare.\n29\u00a0Ne moliaris amico tuo malum,\n cum ille in te habeat fiduciam.\n30\u00a0Ne contendas adversus hominem frustra,\n cum ipse tibi nihil mali fecerit.\n31\u00a0Ne \u00e6muleris hominem injustum,\n nec imiteris vias ejus:\n32\u00a0quia abominatio Domini est omnis illusor,\n et cum simplicibus sermocinatio ejus.\n33\u00a0Egestas a Domino in domo impii;\n habitacula autem justorum benedicentur.\n34\u00a0Ipse deludet illusores,\n et mansuetis dabit gratiam.\n35\u00a0Gloriam sapientes possidebunt;\n stultorum exaltatio ignominia.]","title":"Vulgate: Proverbs: Proverbs Chapter 3","type":"page"}