{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro004.htm","path":"bib/vul/pro004.htm","source_url":"https://sacred-texts.com/bib/vul/pro004.htm","text":"1\u00a0[Audite, filii, disciplinam patris,\n et attendite ut sciatis prudentiam.\n2\u00a0Donum bonum tribuam vobis:\n legem meam ne derelinquatis.\n3\u00a0Nam et ego filius fui patris mei,\n tenellus et unigenitus coram matre mea.\n4\u00a0Et docebat me, atque dicebat:\n Suscipiat verba mea cor tuum;\n custodi pr\u00e6cepta mea, et vives.\n5\u00a0Posside sapientiam, posside prudentiam:\n ne obliviscaris, neque declines a verbis oris mei.\n6\u00a0Ne dimittas eam, et custodiet te:\n dilige eam, et conservabit te.\n7\u00a0Principium sapienti\u00e6: posside sapientiam,\n et in omni possessione tua acquire prudentiam.\n8\u00a0Arripe illam, et exaltabit te;\n glorificaberis ab ea cum eam fueris amplexatus.\n9\u00a0Dabit capiti tuo augmenta gratiarum,\n et corona inclyta proteget te.]\n \n10\u00a0[Audi, fili mi, et suscipe verba mea,\n ut multiplicentur tibi anni vit\u00e6.\n11\u00a0Viam sapienti\u00e6 monstrabo tibi;\n ducam te per semitas \u00e6quitatis:\n12\u00a0quas cum ingressus fueris, non arctabuntur gressus tui,\n et currens non habebis offendiculum.\n13\u00a0Tene disciplinam, ne dimittas eam;\n custodi illam, quia ipsa est vita tua.\n14\u00a0Ne delecteris in semitis impiorum,\n nec tibi placeat malorum via.\n15\u00a0Fuge ab ea, nec transeas per illam;\n declina, et desere eam.\n16\u00a0Non enim dormiunt nisi malefecerint,\n et rapitur somnus ab eis nisi supplantaverint.\n17\u00a0Comedunt panem impietatis,\n et vinum iniquitatis bibunt.\n18\u00a0Justorum autem semita quasi lux splendens procedit,\n et crescit usque ad perfectam diem.\n19\u00a0Via impiorum tenebrosa;\n nesciunt ubi corruant.\n20\u00a0Fili mi, ausculta sermones meos,\n et ad eloquia mea inclina aurem tuam.\n21\u00a0Ne recedant ab oculis tuis:\n custodi ea in medio cordis tui:\n22\u00a0vita enim sunt invenientibus ea,\n et univers\u00e6 carni sanitas.\n23\u00a0Omni custodia serva cor tuum,\n quia ex ipso vita procedit.\n24\u00a0Remove a te os pravum,\n et detrahentia labia sint procul a te.\n25\u00a0Oculi tui recta videant,\n et palpebr\u00e6 tu\u00e6 pr\u00e6cedant gressus tuos.\n26\u00a0Dirige semitam pedibus tuis,\n et omnes vi\u00e6 tu\u00e6 stabilientur.\n27\u00a0Ne declines ad dexteram neque ad sinistram;\n averte pedem tuum a malo:\n vias enim qu\u00e6 a dextris sunt novit Dominus:\n pervers\u00e6 vero sunt qu\u00e6 a sinistris sunt.\n Ipse autem rectos faciet cursus tuos,\n itinera autem tua in pace producet.]","title":"Vulgate: Proverbs: Proverbs Chapter 4","type":"page"}