{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro007.htm","path":"bib/vul/pro007.htm","source_url":"https://sacred-texts.com/bib/vul/pro007.htm","text":"1\u00a0[Fili mi, custodi sermones meos,\n et pr\u00e6cepta mea reconde tibi.\n Fili,\n2\u00a0serva mandata mea, et vives;\n et legem meam quasi pupillam oculi tui:\n3\u00a0liga eam in digitis tuis,\n scribe illam in tabulis cordis tui.\n4\u00a0Dic sapienti\u00e6: Soror mea es,\n et prudentiam voca amicam tuam:\n5\u00a0ut custodiant te a muliere extranea,\n et ab aliena qu\u00e6 verba sua dulcia facit.\n6\u00a0De fenestra enim domus me\u00e6\n per cancellos prospexi,\n7\u00a0et video parvulos;\n considero vecordem juvenem,\n8\u00a0qui transit per plateam juxta angulum\n et prope viam domus illius graditur:\n9\u00a0in obscuro, advesperascente die,\n in noctis tenebris et caligine.\n10\u00a0Et ecce occurrit illi mulier ornatu meretricio,\n pr\u00e6parata ad capiendas animas:\n garrula et vaga,\n11\u00a0quietis impatiens,\n nec valens in domo consistere pedibus suis;\n12\u00a0nunc foris, nunc in plateis,\n nunc juxta angulos insidians.\n13\u00a0Apprehensumque deosculatur juvenem,\n et procaci vultu blanditur, dicens:\n14\u00a0Victimas pro salute vovi;\n hodie reddidi vota mea:\n15\u00a0idcirco egressa sum in occursum tuum,\n desiderans te videre, et reperi.\n16\u00a0Intexui funibus lectulum meum;\n stravi tapetibus pictis ex \u00c6gypto:\n17\u00a0aspersi cubile meum myrrha,\n et alo\u00eb, et cinnamomo.\n18\u00a0Veni, inebriemur uberibus,\n et fruamur cupitis amplexibus donec illucescat dies.\n19\u00a0Non est enim vir in domo sua:\n abiit via longissima:\n20\u00a0sacculum pecuni\u00e6 secum tulit;\n in die plen\u00e6 lun\u00e6 reversurus est in domum suam.\n21\u00a0Irretivit eum multis sermonibus,\n et blanditiis labiorum protraxit illum.\n22\u00a0Statim eam sequitur quasi bos ductus ad victimam,\n et quasi agnus lasciviens,\n et ignorans quod ad vincula stultus trahatur:\n23\u00a0donec transfigat sagitta jecur ejus,\n velut si avis festinet ad laqueum,\n et nescit quod de periculo anim\u00e6 illius agitur.\n24\u00a0Nunc ergo, fili mi, audi me,\n et attende verbis oris mei.\n25\u00a0Ne abstrahatur in viis illius mens tua,\n neque decipiaris semitis ejus;\n26\u00a0multos enim vulneratos dejecit,\n et fortissimi quique interfecti sunt ab ea.\n27\u00a0Vi\u00e6 inferi domus ejus,\n penetrantes in interiora mortis.]","title":"Vulgate: Proverbs: Proverbs Chapter 7","type":"page"}