{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro008.htm","path":"bib/vul/pro008.htm","source_url":"https://sacred-texts.com/bib/vul/pro008.htm","text":"1\u00a0[Numquid non sapientia clamitat,\n et prudentia dat vocem suam?\n2\u00a0In summis excelsisque verticibus supra viam,\n in mediis semitis stans,\n3\u00a0juxta portas civitatis,\n in ipsis foribus loquitur, dicens:\n4\u00a0O viri, ad vos clamito,\n et vox mea ad filios hominum.\n5\u00a0Intelligite, parvuli, astutiam,\n et insipientes, animadvertite.\n6\u00a0Audite, quoniam de rebus magnis locutura sum,\n et aperientur labia mea ut recta pr\u00e6dicent.\n7\u00a0Veritatem meditabitur guttur meum,\n et labia mea detestabuntur impium.\n8\u00a0Justi sunt omnes sermones mei:\n non est in eis pravum quid, neque perversum;\n9\u00a0recti sunt intelligentibus,\n et \u00e6qui invenientibus scientiam.\n10\u00a0Accipite disciplinam meam, et non pecuniam;\n doctrinam magis quam aurum eligite:\n11\u00a0melior est enim sapientia cunctis pretiosissimis,\n et omne desiderabile ei non potest comparari.]\n \n12\u00a0[Ego sapientia, habito in consilio,\n et eruditis intersum cogitationibus.\n13\u00a0Timor Domini odit malum:\n arrogantiam, et superbiam,\n et viam pravam, et os bilingue, detestor.\n14\u00a0Meum est consilium et \u00e6quitas;\n mea est prudentia, mea est fortitudo.\n15\u00a0Per me reges regnant,\n et legum conditores justa decernunt;\n16\u00a0per me principes imperant,\n et potentes decernunt justitiam.\n17\u00a0Ego diligentes me diligo,\n et qui mane vigilant ad me, invenient me.\n18\u00a0Mecum sunt diviti\u00e6 et gloria,\n opes superb\u00e6 et justitia.\n19\u00a0Melior est enim fructus meus auro et lapide pretioso,\n et genimina me argento electo.\n20\u00a0In viis justiti\u00e6 ambulo,\n in medio semitarum judicii:\n21\u00a0ut ditem diligentes me,\n et thesauros eorum repleam.]\n \n22\u00a0[Dominus possedit me in initio viarum suarum\n antequam quidquam faceret a principio.\n23\u00a0Ab \u00e6terno ordinata sum,\n et ex antiquis antequam terra fieret.\n24\u00a0Nondum erant abyssi, et ego jam concepta eram:\n necdum fontes aquarum eruperant,\n25\u00a0necdum montes gravi mole constiterant:\n ante colles ego parturiebar.\n26\u00a0Adhuc terram non fecerat, et flumina,\n et cardines orbis terr\u00e6.\n27\u00a0Quando pr\u00e6parabat c\u00e6los, aderam;\n quando certa lege et gyro vallabat abyssos;\n28\u00a0quando \u00e6thera firmabat sursum,\n et librabat fontes aquarum;\n29\u00a0quando circumdabat mari terminum suum,\n et legem ponebat aquis, ne transirent fines suos;\n quando appendebat fundamenta terr\u00e6:\n30\u00a0cum eo eram, cuncta componens.\n Et delectabar per singulos dies,\n ludens coram eo omni tempore,\n31\u00a0ludens in orbe terrarum;\n et delici\u00e6 me\u00e6 esse cum filiis hominum.\n32\u00a0Nunc ergo, filii, audite me:\n beati qui custodiunt vias meas.\n33\u00a0Audite disciplinam, et estote sapientes,\n et nolite abjicere eam.\n34\u00a0Beatus homo qui audit me,\n et qui vigilat ad fores meas quotidie,\n et observat ad postes ostii mei.\n35\u00a0Qui me invenerit, inveniet vitam,\n et hauriet salutem a Domino.\n36\u00a0Qui autem in me peccaverit, l\u00e6det animam suam;\n omnes qui me oderunt diligunt mortem.]","title":"Vulgate: Proverbs: Proverbs Chapter 8","type":"page"}