{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro010.htm","path":"bib/vul/pro010.htm","source_url":"https://sacred-texts.com/bib/vul/pro010.htm","text":"1\u00a0[Filius sapiens l\u00e6tificat patrem,\n filius vero stultus m\u0153stitia est matris su\u00e6.\n2\u00a0Nil proderunt thesauri impietatis,\n justitia vero liberabit a morte.\n3\u00a0Non affliget Dominus fame animam justi,\n et insidias impiorum subvertet.\n4\u00a0Egestatem operata est manus remissa;\n manus autem fortium divitias parat.\n Qui nititur mendaciis, hic pascit ventos;\n idem autem ipse sequitur aves volantes.\n5\u00a0Qui congregat in messe, filius sapiens est;\n qui autem stertit \u00e6state, filius confusionis.\n6\u00a0Benedictio Domini super caput justi;\n os autem impiorum operit iniquitas.\n7\u00a0Memoria justi cum laudibus,\n et nomen impiorum putrescet.\n8\u00a0Sapiens corde pr\u00e6cepta suscipit;\n stultus c\u00e6ditur labiis.\n9\u00a0Qui ambulat simpliciter ambulat confidenter;\n qui autem depravat vias suas manifestus erit.\n10\u00a0Qui annuit oculo dabit dolorem;\n et stultus labiis verberabitur.]\n \n11\u00a0[Vena vit\u00e6 os justi,\n et os impiorum operit iniquitatem.\n12\u00a0Odium suscitat rixas,\n et universa delicta operit caritas.\n13\u00a0In labiis sapientis invenitur sapientia,\n et virga in dorso ejus qui indiget corde.\n14\u00a0Sapientes abscondunt scientiam;\n os autem stulti confusioni proximum est.\n15\u00a0Substantia divitis, urbs fortitudinis ejus;\n pavor pauperum egestas eorum.\n16\u00a0Opus justi ad vitam,\n fructus autem impii ad peccatum.\n17\u00a0Via vit\u00e6 custodienti disciplinam;\n qui autem increpationes relinquit, errat.\n18\u00a0Abscondunt odium labia mendacia;\n qui profert contumeliam, insipiens est.\n19\u00a0In multiloquio non deerit peccatum,\n qui autem moderatur labia sua prudentissimus est.\n20\u00a0Argentum electum lingua justi;\n cor autem impiorum pro nihilo.\n21\u00a0Labia justi erudiunt plurimos;\n qui autem indocti sunt in cordis egestate morientur.]\n \n22\u00a0[Benedictio Domini divites facit,\n nec sociabitur eis afflictio.\n23\u00a0Quasi per risum stultus operatur scelus,\n sapientia autem est viro prudentia.\n24\u00a0Quod timet impius veniet super eum;\n desiderium suum justus dabitur.\n25\u00a0Quasi tempestas transiens non erit impius;\n justus autem quasi fundamentum sempiternum.\n26\u00a0Sicut acetum dentibus, et fumus oculis,\n sic piger his qui miserunt eum.\n27\u00a0Timor Domini apponet dies,\n et anni impiorum breviabuntur.\n28\u00a0Exspectatio justorum l\u00e6titia,\n spes autem impiorum peribit.\n29\u00a0Fortitudo simplicis via Domini,\n et pavor his qui operantur malum.\n30\u00a0Justus in \u00e6ternum non commovebitur,\n impii autem non habitabunt super terram.\n31\u00a0Os justi parturiet sapientiam;\n lingua pravorum peribit.\n32\u00a0Labia justi considerant placita,\n et os impiorum perversa.]","title":"Vulgate: Proverbs: Proverbs Chapter 10","type":"page"}