{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro011.htm","path":"bib/vul/pro011.htm","source_url":"https://sacred-texts.com/bib/vul/pro011.htm","text":"1\u00a0[Statera dolosa abominatio est apud Dominum,\n et pondus \u00e6quum voluntas ejus.\n2\u00a0Ubi fuerit superbia, ibi erit et contumelia;\n ubi autem est humilitas, ibi et sapientia.\n3\u00a0Simplicitas justorum diriget eos,\n et supplantatio perversorum vastabit illos.\n4\u00a0Non proderunt diviti\u00e6 in die ultionis;\n justitia autem liberabit a morte.\n5\u00a0Justitia simplicis diriget viam ejus,\n et in impietate sua corruet impius.\n6\u00a0Justitia rectorum liberabit eos,\n et in insidiis suis capientur iniqui.\n7\u00a0Mortuo homine impio, nulla erit ultra spes,\n et exspectatio sollicitorum peribit.\n8\u00a0Justus de angustia liberatus est,\n et tradetur impius pro eo.]\n \n9\u00a0[Simulator ore decipit amicum suum;\n justi autem liberabuntur scientia.\n10\u00a0In bonis justorum exsultabit civitas,\n et in perditione impiorum erit laudatio.\n11\u00a0Benedictione justorum exaltabitur civitas,\n et ore impiorum subvertetur.\n12\u00a0Qui despicit amicum suum indigens corde est;\n vir autem prudens tacebit.\n13\u00a0Qui ambulat fraudulenter, revelat arcana;\n qui autem fidelis est animi, celat amici commissum.\n14\u00a0Ubi non est gubernator, populus corruet;\n salus autem, ubi multa consilia.\n15\u00a0Affligetur malo qui fidem facit pro extraneo;\n qui autem cavet laqueos securus erit.\n16\u00a0Mulier gratiosa inveniet gloriam,\n et robusti habebunt divitias.]\n \n17\u00a0[Benefacit anim\u00e6 su\u00e6 vir misericors;\n qui autem crudelis est, etiam propinquos abjicit.\n18\u00a0Impius facit opus instabile,\n seminanti autem justitiam merces fidelis.\n19\u00a0Clementia pr\u00e6parat vitam,\n et sectatio malorum mortem.\n20\u00a0Abominabile Domino cor pravum,\n et voluntas ejus in iis qui simpliciter ambulant.\n21\u00a0Manus in manu non erit innocens malus;\n semen autem justorum salvabitur.\n22\u00a0Circulus aureus in naribus suis,\n mulier pulchra et fatua.\n23\u00a0Desiderium justorum omne bonum est;\n pr\u00e6stolatio impiorum furor.\n24\u00a0Alii dividunt propria, et ditiores fiunt;\n alii rapiunt non sua, et semper in egestate sunt.\n25\u00a0Anima qu\u00e6 benedicit impinguabitur,\n et qui inebriat, ipse quoque inebriabitur.\n26\u00a0Qui abscondit frumenta maledicetur in populis;\n benedictio autem super caput vendentium.\n27\u00a0Bene consurgit diluculo qui qu\u00e6rit bona;\n qui autem investigator malorum est, opprimetur ab eis.\n28\u00a0Qui confidit in divitiis suis corruet:\n justi autem quasi virens folium germinabunt.\n29\u00a0Qui conturbat domum suam possidebit ventos,\n et qui stultus est serviet sapienti.\n30\u00a0Fructus justi lignum vit\u00e6,\n et qui suscipit animas sapiens est.\n31\u00a0Si justus in terra recipit,\n quanto magis impius et peccator!]","title":"Vulgate: Proverbs: Proverbs Chapter 11","type":"page"}