{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro012.htm","path":"bib/vul/pro012.htm","source_url":"https://sacred-texts.com/bib/vul/pro012.htm","text":"1\u00a0[Qui diligit disciplinam diligit scientiam;\n qui autem odit increpationes insipiens est.\n2\u00a0Qui bonus est hauriet gratiam a Domino;\n qui autem confidit in cogitationibus suis impie agit.\n3\u00a0Non roborabitur homo ex impietate,\n et radix justorum non commovebitur.\n4\u00a0Mulier diligens corona est viro suo;\n et putredo in ossibus ejus, qu\u00e6 confusione res dignas gerit.\n5\u00a0Cogitationes justorum judicia,\n et consilia impiorum fraudulenta.\n6\u00a0Verba impiorum insidiantur sanguini;\n os justorum liberabit eos.\n7\u00a0Verte impios, et non erunt;\n domus autem justorum permanebit.\n8\u00a0Doctrina sua noscetur vir;\n qui autem vanus et excors est patebit contemptui.\n9\u00a0Melior est pauper et sufficiens sibi\n quam gloriosus et indigens pane.\n10\u00a0Novit justus jumentorum suorum animas;\n viscera autem impiorum crudelia.\n11\u00a0Qui operatur terram suam satiabitur panibus;\n qui autem sectatur otium stultissimus est.\n Qui suavis est in vini demorationibus,\n in suis munitionibus relinquit contumeliam.\n12\u00a0Desiderium impii munimentum est pessimorum;\n radix autem justorum proficiet.]\n \n13\u00a0[Propter peccata labiorum ruina proximat malo;\n effugiet autem justus de angustia.\n14\u00a0De fructu oris sui unusquisque replebitur bonis,\n et juxta opera manuum suarum retribuetur ei.\n15\u00a0Via stulti recta in oculis ejus;\n qui autem sapiens est audit consilia.\n16\u00a0Fatuus statim indicat iram suam;\n qui autem dissimulat injuriam callidus est.\n17\u00a0Qui quod novit loquitur, index justiti\u00e6 est;\n qui autem mentitur, testis est fraudulentus.\n18\u00a0Est qui promittit, et quasi gladio pungitur conscienti\u00e6:\n lingua autem sapientium sanitas est.\n19\u00a0Labium veritatis firmum erit in perpetuum;\n qui autem testis est repentinus, concinnat linguam mendacii.\n20\u00a0Dolus in corde cogitantium mala;\n qui autem pacis ineunt consilia, sequitur eos gaudium.\n21\u00a0Non contristabit justum quidquid ei acciderit:\n impii autem replebuntur malo.\n22\u00a0Abominatio est Domino labia mendacia;\n qui autem fideliter agunt placent ei.\n23\u00a0Homo versatus celat scientiam,\n et cor insipientium provocat stultitiam.]\n \n24\u00a0[Manus fortium dominabitur;\n qu\u00e6 autem remissa est, tributis serviet.\n25\u00a0M\u0153ror in corde viri humiliabit illum,\n et sermone bono l\u00e6tificabitur.\n26\u00a0Qui negligit damnum propter amicum, justus est;\n iter autem impiorum decipiet eos.\n27\u00a0Non inveniet fraudulentus lucrum,\n et substantia hominis erit auri pretium.\n28\u00a0In semita justiti\u00e6 vita;\n iter autem devium ducit ad mortem.]","title":"Vulgate: Proverbs: Proverbs Chapter 12","type":"page"}