{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro015.htm","path":"bib/vul/pro015.htm","source_url":"https://sacred-texts.com/bib/vul/pro015.htm","text":"1\u00a0[Responsio mollis frangit iram;\n sermo durus suscitat furorem.\n2\u00a0Lingua sapientium ornat scientiam;\n os fatuorum ebullit stultitiam.\n3\u00a0In omni loco, oculi Domini\n contemplantur bonos et malos.\n4\u00a0Lingua placabilis lignum vit\u00e6;\n qu\u00e6 autem immoderata est conteret spiritum.\n5\u00a0Stultus irridet disciplinam patris sui;\n qui autem custodit increpationes astutior fiet.\n In abundanti justitia virtus maxima est:\n cogitationes autem impiorum eradicabuntur.\n6\u00a0Domus justi plurima fortitudo,\n et in fructibus impii conturbatio.\n7\u00a0Labia sapientium disseminabunt scientiam;\n cor stultorum dissimile erit.\n8\u00a0Victim\u00e6 impiorum abominabiles Domino;\n vota justorum placabilia.\n9\u00a0Abominatio est Domino via impii;\n qui sequitur justitiam diligitur ab eo.\n10\u00a0Doctrina mala deserenti viam vit\u00e6;\n qui increpationes odit, morietur.\n11\u00a0Infernus et perditio coram Domino;\n quanto magis corda filiorum hominum!\n12\u00a0Non amat pestilens eum qui se corripit,\n nec ad sapientes graditur.]\n \n13\u00a0[Cor gaudens exhilarat faciem;\n in m\u0153rore animi dejicitur spiritus.\n14\u00a0Cor sapientis qu\u00e6rit doctrinam,\n et os stultorum pascitur imperitia.\n15\u00a0Omnes dies pauperis, mali;\n secura mens quasi juge convivium.\n16\u00a0Melius est parum cum timore Domini,\n quam thesauri magni et insatiabiles.\n17\u00a0Melius est vocari ad olera cum caritate,\n quam ad vitulum saginatum cum odio.\n18\u00a0Vir iracundus provocat rixas;\n qui patiens est mitigat suscitatas.\n19\u00a0Iter pigrorum quasi sepes spinarum;\n via justorum absque offendiculo.\n20\u00a0Filius sapiens l\u00e6tificat patrem,\n et stultus homo despicit matrem suam.\n21\u00a0Stultitia gaudium stulto,\n et vir prudens dirigit gressus suos.\n22\u00a0Dissipantur cogitationes ubi non est consilium;\n ubi vero sunt plures consiliarii, confirmantur.\n23\u00a0L\u00e6tatur homo in sententia oris sui,\n et sermo opportunus est optimus.\n24\u00a0Semita vit\u00e6 super eruditum,\n ut declinet de inferno novissimo.]\n \n25\u00a0[Domum superborum demolietur Dominus,\n et firmos faciet terminos vidu\u00e6.\n26\u00a0Abominatio Domini cogitationes mal\u00e6,\n et purus sermo pulcherrimus firmabitur ab eo.\n27\u00a0Conturbat domum suam qui sectatur avaritiam;\n qui autem odit munera, vivet.\n Per misericordiam et fidem purgantur peccata:\n per timorem autem Domini declinat omnis a malo.\n28\u00a0Mens justi meditatur obedientiam;\n os impiorum redundat malis.\n29\u00a0Longe est Dominus ab impiis,\n et orationes justorum exaudiet.\n30\u00a0Lux oculorum l\u00e6tificat animam;\n fama bona impinguat ossa.\n31\u00a0Auris qu\u00e6 audit increpationes vit\u00e6\n in medio sapientium commorabitur.\n32\u00a0Qui abjicit disciplinam despicit animam suam;\n qui autem acquiescit increpationibus possessor est cordis.\n33\u00a0Timor Domini disciplina sapienti\u00e6,\n et gloriam pr\u00e6cedit humilitas.]","title":"Vulgate: Proverbs: Proverbs Chapter 15","type":"page"}