{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro017.htm","path":"bib/vul/pro017.htm","source_url":"https://sacred-texts.com/bib/vul/pro017.htm","text":"1\u00a0[Melior est buccella sicca cum gaudio\n quam domus plena victimis cum jurgio.\n2\u00a0Servus sapiens dominabitur filiis stultis,\n et inter fratres h\u00e6reditatem dividet.\n3\u00a0Sicut igne probatur argentum et aurum camino,\n ita corda probat Dominus.\n4\u00a0Malus obedit lingu\u00e6 iniqu\u00e6,\n et fallax obtemperat labiis mendacibus.\n5\u00a0Qui despicit pauperem exprobrat factori ejus,\n et qui ruina l\u00e6tatur alterius non erit impunitus.\n6\u00a0Corona senum filii filiorum,\n et gloria filiorum patres eorum.\n7\u00a0Non decent stultum verba composita,\n nec principem labium mentiens.\n8\u00a0Gemma gratissima exspectatio pr\u00e6stolantis;\n quocumque se vertit, prudenter intelligit.\n9\u00a0Qui celat delictum qu\u00e6rit amicitias;\n qui altero sermone repetit, separat f\u0153deratos.\n10\u00a0Plus proficit correptio apud prudentem,\n quam centum plag\u00e6 apud stultum.\n11\u00a0Semper jurgia qu\u00e6rit malus:\n angelus autem crudelis mittetur contra eum.\n12\u00a0Expedit magis urs\u00e6 occurrere raptis f\u0153tibus,\n quam fatuo confidenti in stultitia sua.\n13\u00a0Qui reddit mala pro bonis,\n non recedet malum de domo ejus.\n14\u00a0Qui dimittit aquam caput est jurgiorum,\n et antequam patiatur contumeliam judicium deserit.]\n \n15\u00a0[Qui justificat impium, et qui condemnat justum,\n abominabilis est uterque apud Deum.\n16\u00a0Quid prodest stulto habere divitias,\n cum sapientiam emere non possit?\n Qui altum facit domum suam qu\u00e6rit ruinam,\n et qui evitat discere incidet in mala.\n17\u00a0Omni tempore diligit qui amicus est,\n et frater in angustiis comprobatur.\n18\u00a0Stultus homo plaudet manibus,\n cum spoponderit pro amico suo.\n19\u00a0Qui meditatur discordias diligit rixas,\n et qui exaltat ostium qu\u00e6rit ruinam.\n20\u00a0Qui perversi cordis est non inveniet bonum,\n et qui vertit linguam incidet in malum.\n21\u00a0Natus est stultus in ignominiam suam;\n sed nec pater in fatuo l\u00e6tabitur.\n22\u00a0Animus gaudens \u00e6tatem floridam facit;\n spiritus tristis exsiccat ossa.\n23\u00a0Munera de sinu impius accipit,\n ut pervertat semitas judicii.\n24\u00a0In facie prudentis lucet sapientia;\n oculi stultorum in finibus terr\u00e6.\n25\u00a0Ira patris filius stultus,\n et dolor matris qu\u00e6 genuit eum.\n26\u00a0Non est bonum damnum inferre justo,\n nec percutere principem qui recta judicat.\n27\u00a0Qui moderatur sermones suos doctus et prudens est,\n et pretiosi spiritus vir eruditus.\n28\u00a0Stultus quoque, si tacuerit, sapiens reputabitur,\n et si compresserit labia sua, intelligens.]","title":"Vulgate: Proverbs: Proverbs Chapter 17","type":"page"}