{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro018.htm","path":"bib/vul/pro018.htm","source_url":"https://sacred-texts.com/bib/vul/pro018.htm","text":"1\u00a0[Occasiones qu\u00e6rit qui vult recedere ab amico:\n omni tempore erit exprobrabilis.\n2\u00a0Non recipit stultus verba prudenti\u00e6,\n nisi ea dixeris qu\u00e6 versantur in corde ejus.\n3\u00a0Impius, cum in profundum venerit peccatorum, contemnit;\n sed sequitur eum ignominia et opprobrium.\n4\u00a0Aqua profunda verba ex ore viri,\n et torrens redundans fons sapienti\u00e6.\n5\u00a0Accipere personam impii non est bonum,\n ut declines a veritate judicii.]\n \n6\u00a0[Labia stulti miscent se rixis,\n et os ejus jurgia provocat.\n7\u00a0Os stulti contritio ejus,\n et labia ipsius ruina anim\u00e6 ejus.\n8\u00a0Verba bilinguis quasi simplicia,\n et ipsa perveniunt usque ad interiora ventris.\n Pigrum dejicit timor;\n anim\u00e6 autem effeminatorum esurient.\n9\u00a0Qui mollis et dissolutus est in opere suo\n frater est sua opera dissipantis.\n10\u00a0Turris fortissima nomen Domini;\n ad ipsum currit justus, et exaltabitur.\n11\u00a0Substantia divitis urbs roboris ejus,\n et quasi murus validus circumdans eum.\n12\u00a0Antequam conteratur, exaltatur cor hominis,\n et antequam glorificetur, humiliatur.\n13\u00a0Qui prius respondet quam audiat,\n stultum se esse demonstrat, et confusione dignum.\n14\u00a0Spiritus viri sustentat imbecillitatem suam;\n spiritum vero ad irascendum facilem quis poterit sustinere?\n15\u00a0Cor prudens possidebit scientiam,\n et auris sapientium qu\u00e6rit doctrinam.]\n \n16\u00a0[Donum hominis dilatat viam ejus,\n et ante principes spatium ei facit.\n17\u00a0Justus prior est accusator sui:\n venit amicus ejus, et investigabit eum.\n18\u00a0Contradictiones comprimit sors,\n et inter potentes quoque dijudicat.\n19\u00a0Frater qui adjuvatur a fratre quasi civitas firma,\n et judicia quasi vectes urbium.\n20\u00a0De fructu oris viri replebitur venter ejus,\n et genimina labiorum ipsius saturabunt eum.\n21\u00a0Mors et vita in manu lingu\u00e6;\n qui diligunt eam comedent fructus ejus.\n22\u00a0Qui invenit mulierem bonam invenit bonum,\n et hauriet jucunditatem a Domino.\n Qui expellit mulierem bonam expellit bonum;\n qui autem tenet adulteram stultus est et impius.\n23\u00a0Cum obsecrationibus loquetur pauper,\n et dives effabitur rigide.\n24\u00a0Vir amabilis ad societatem\n magis amicus erit quam frater.]","title":"Vulgate: Proverbs: Proverbs Chapter 18","type":"page"}