{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro022.htm","path":"bib/vul/pro022.htm","source_url":"https://sacred-texts.com/bib/vul/pro022.htm","text":"1\u00a0[Melius est nomen bonum quam diviti\u00e6 mult\u00e6;\n super argentum et aurum gratia bona.\n2\u00a0Dives et pauper obviaverunt sibi:\n utriusque operator est Dominus.\n3\u00a0Callidus vidit malum, et abscondit se;\n innocens pertransiit, et afflictus est damno.\n4\u00a0Finis modesti\u00e6 timor Domini,\n diviti\u00e6, et gloria, et vita.\n5\u00a0Arma et gladii in via perversi;\n custos autem anim\u00e6 su\u00e6 longe recedit ab eis.\n6\u00a0Proverbium est: adolescens juxta viam suam;\n etiam cum senuerit, non recedet ab ea.\n7\u00a0Dives pauperibus imperat,\n et qui accipit mutuum servus est f\u0153nerantis.\n8\u00a0Qui seminat iniquitatem metet mala,\n et virga ir\u00e6 su\u00e6 consummabitur.\n9\u00a0Qui pronus est ad misericordiam benedicetur:\n de panibus enim suis dedit pauperi.\n Victoriam et honorem acquiret qui dat munera;\n animam autem aufert accipientium.\n10\u00a0Ejice derisorem, et exibit cum eo jurgium,\n cessabuntque caus\u00e6 et contumeli\u00e6.\n11\u00a0Qui diligit cordis munditiam,\n propter gratiam labiorum suorum habebit amicum regem.\n12\u00a0Oculi Domini custodiunt scientiam,\n et supplantantur verba iniqui.\n13\u00a0Dicit piger: Leo est foris;\n in medio platearum occidendus sum.\n14\u00a0Fovea profunda os alien\u00e6:\n cui iratus est Dominus, incidet in eam.\n15\u00a0Stultitia colligata est in corde pueri,\n et virga disciplin\u00e6 fugabit eam.\n16\u00a0Qui calumniatur pauperem ut augeat divitias suas,\n dabit ipse ditiori, et egebit.]\n \n17\u00a0[Inclina aurem tuam, et audi verba sapientium:\n appone autem cor ad doctrinam meam,\n18\u00a0qu\u00e6 pulchra erit tibi cum servaveris eam in ventre tuo,\n et redundabit in labiis tuis:\n19\u00a0ut sit in Domino fiducia tua,\n unde et ostendi eam tibi hodie.\n20\u00a0Ecce descripsi eam tibi tripliciter,\n in cogitationibus et scientia:\n21\u00a0ut ostenderem tibi firmitatem et eloquia veritatis,\n respondere ex his illis qui miserunt te.\n22\u00a0Non facias violentiam pauperi quia pauper est,\n neque conteras egenum in porta:\n23\u00a0quia judicabit Dominus causam ejus,\n et configet eos qui confixerunt animam ejus.\n24\u00a0Noli esse amicus homini iracundo,\n neque ambules cum viro furioso:\n25\u00a0ne forte discas semitas ejus,\n et sumas scandalum anim\u00e6 tu\u00e6.\n26\u00a0Noli esse cum his qui defigunt manus suas,\n et qui vades se offerunt pro debitis:\n27\u00a0si enim non habes unde restituas,\n quid caus\u00e6 est ut tollat operimentum de cubili tuo?\n28\u00a0Ne transgrediaris terminos antiquos,\n quos posuerunt patres tui.\n29\u00a0Vidisti virum velocem in opere suo?\n coram regibus stabit, nec erit ante ignobiles.]","title":"Vulgate: Proverbs: Proverbs Chapter 22","type":"page"}