{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro025.htm","path":"bib/vul/pro025.htm","source_url":"https://sacred-texts.com/bib/vul/pro025.htm","text":"1 H\u00e6 quoque parabol\u00e6 Salomonis, quas transtulerunt viri Ezechi\u00e6 regis Juda.\n2\u00a0[Gloria Dei est celare verbum,\n et gloria regum investigare sermonem.\n3\u00a0C\u00e6lum sursum, et terra deorsum,\n et cor regum inscrutabile.\n4\u00a0Aufer rubiginem de argento,\n et egredietur vas purissimum.\n5\u00a0Aufer impietatem de vultu regis,\n et firmabitur justitia thronus ejus.\n6\u00a0Ne gloriosus appareas coram rege,\n et in loco magnorum ne steteris.\n7\u00a0Melius est enim ut dicatur tibi: Ascende huc,\n quam ut humilieris coram principe.]\n \n8\u00a0[Qu\u00e6 viderunt oculi tui ne proferas in jurgio cito,\n ne postea emendare non possis,\n cum dehonestaveris amicum tuum.\n9\u00a0Causam tuam tracta cum amico tuo,\n et secretum extraneo ne reveles:\n10\u00a0ne forte insultet tibi cum audierit,\n et exprobrare non cesset.\n Gratia et amicitia liberant:\n quas tibi serva, ne exprobrabilis fias.\n11\u00a0Mala aurea in lectis argenteis,\n qui loquitur verbum in tempore suo.\n12\u00a0Inauris aurea, et margaritum fulgens,\n qui arguit sapientem et aurem obedientem.\n13\u00a0Sicut frigus nivis in die messis,\n ita legatus fidelis ei qui misit eum:\n animam ipsius requiescere facit.\n14\u00a0Nubes, et ventus, et pluvi\u00e6 non sequentes,\n vir gloriosus et promissa non complens.\n15\u00a0Patientia lenietur princeps,\n et lingua mollis confringet duritiam.]\n \n16\u00a0[Mel invenisti: comede quod sufficit tibi,\n ne forte satiatus evomas illud.\n17\u00a0Subtrahe pedem tuum de domo proximi tui,\n nequando satiatus oderit te.\n18\u00a0Jaculum, et gladius, et sagitta acuta,\n homo qui loquitur contra proximum suum falsum testimonium.\n19\u00a0Dens putridus, et pes lassus,\n qui sperat super infideli in die angusti\u00e6,\n20\u00a0et amittit pallium in die frigoris.\n Acetum in nitro,\n qui cantat carmina cordi pessimo.\n Sicut tinea vestimento, et vermis ligno,\n ita tristitia viri nocet cordi.\n21\u00a0Si esurierit inimicus tuus, ciba illum;\n si sitierit, da ei aquam bibere:\n22\u00a0prunas enim congregabis super caput ejus,\n et Dominus reddet tibi.\n23\u00a0Ventus aquilo dissipat pluvias,\n et facies tristis linguam detrahentem.\n24\u00a0Melius est sedere in angulo domatis\n quam cum muliere litigiosa et in domo communi.\n25\u00a0Aqua frigida anim\u00e6 sitienti,\n et nuntius bonus de terra longinqua.\n26\u00a0Fons turbatus pede et vena corrupta,\n justus cadens coram impio.\n27\u00a0Sicut qui mel multum comedit non est ei bonum,\n sic qui scrutator est majestatis opprimetur a gloria.\n28\u00a0Sicut urbs patens et absque murorum ambitu,\n ita vir qui non potest in loquendo cohibere spiritum suum.]","title":"Vulgate: Proverbs: Proverbs Chapter 25","type":"page"}