{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro026.htm","path":"bib/vul/pro026.htm","source_url":"https://sacred-texts.com/bib/vul/pro026.htm","text":"1\u00a0[Quomodo nix in \u00e6state, et pluvi\u00e6 in messe,\n sic indecens est stulto gloria.\n2\u00a0Sicut avis ad alia transvolans, et passer quolibet vadens,\n sic maledictum frustra prolatum in quempiam superveniet.\n3\u00a0Flagellum equo, et camus asino,\n et virga in dorso imprudentium.\n4\u00a0Ne respondeas stulto juxta stultitiam suam,\n ne efficiaris ei similis.\n5\u00a0Responde stulto juxta stultitiam suam,\n ne sibi sapiens esse videatur.\n6\u00a0Claudus pedibus, et iniquitatem bibens,\n qui mittit verba per nuntium stultum.\n7\u00a0Quomodo pulchras frustra habet claudus tibias,\n sic indecens est in ore stultorum parabola.\n8\u00a0Sicut qui mittit lapidem in acervum Mercurii,\n ita qui tribuit insipienti honorem.\n9\u00a0Quomodo si spina nascatur in manu temulenti,\n sic parabola in ore stultorum.\n10\u00a0Judicium determinat causas,\n et qui imponit stulto silentium iras mitigat.\n11\u00a0Sicut canis qui revertitur ad vomitum suum,\n sic imprudens qui iterat stultitiam suam.\n12\u00a0Vidisti hominem sapientem sibi videri?\n magis illo spem habebit insipiens.]\n \n13\u00a0[Dicit piger: Leo est in via,\n et le\u00e6na in itineribus.\n14\u00a0Sicut ostium vertitur in cardine suo,\n ita piger in lectulo suo.\n15\u00a0Abscondit piger manum sub ascella sua,\n et laborat si ad os suum eam converterit.\n16\u00a0Sapientior sibi piger videtur\n septem viris loquentibus sententias.]\n \n17\u00a0[Sicut qui apprehendit auribus canem,\n sic qui transit impatiens et commiscetur rix\u00e6 alterius.\n18\u00a0Sicut noxius est qui mittit sagittas et lanceas in mortem,\n19\u00a0ita vir fraudulenter nocet amico suo,\n et cum fuerit deprehensus dicit: Ludens feci.\n20\u00a0Cum defecerint ligna extinguetur ignis,\n et susurrone subtracto, jurgia conquiescent.\n21\u00a0Sicut carbones ad prunas, et ligna ad ignem,\n sic homo iracundus suscitat rixas.\n22\u00a0Verba susurronis quasi simplicia,\n et ipsa perveniunt ad intima ventris.\n23\u00a0Quomodo si argento sordido ornare velis vas fictile,\n sic labia tumentia cum pessimo corde sociata.\n24\u00a0Labiis suis intelligitur inimicus,\n cum in corde tractaverit dolos.\n25\u00a0Quando submiserit vocem suam, ne credideris ei,\n quoniam septem nequiti\u00e6 sunt in corde illius.\n26\u00a0Qui operit odium fraudulenter,\n revelabitur malitia ejus in consilio.\n27\u00a0Qui fodit foveam incidet in eam,\n et qui volvit lapidem revertetur ad eum.\n28\u00a0Lingua fallax non amat veritatem,\n et os lubricum operatur ruinas.]","title":"Vulgate: Proverbs: Proverbs Chapter 26","type":"page"}