{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro027.htm","path":"bib/vul/pro027.htm","source_url":"https://sacred-texts.com/bib/vul/pro027.htm","text":"1\u00a0[Ne glorieris in crastinum,\n ignorans quid superventura pariat dies.\n2\u00a0Laudet te alienus, et non os tuum;\n extraneus, et non labia tua.\n3\u00a0Grave est saxum, et onerosa arena,\n sed ira stulti utroque gravior.\n4\u00a0Ira non habet misericordiam nec erumpens furor,\n et impetum concitati ferre quis poterit?\n5\u00a0Melior est manifesta correptio\n quam amor absconditus.\n6\u00a0Meliora sunt vulnera diligentis\n quam fraudulenta oscula odientis.\n7\u00a0Anima saturata calcabit favum,\n et anima esuriens etiam amarum pro dulci sumet.\n8\u00a0Sicut avis transmigrans de nido suo,\n sic vir qui derelinquit locum suum.\n9\u00a0Unguento et variis odoribus delectatur cor,\n et bonis amici consiliis anima dulcoratur.]\n \n10\u00a0[Amicum tuum et amicum patris tui ne dimiseris,\n et domum fratris tui ne ingrediaris in die afflictionis tu\u00e6.\n Melior est vicinus juxta\n quam frater procul.\n11\u00a0Stude sapienti\u00e6, fili mi, et l\u00e6tifica cor meum,\n ut possis exprobranti respondere sermonem.\n12\u00a0Astutus videns malum, absconditus est:\n parvuli transeuntes sustinuerunt dispendia.\n13\u00a0Tolle vestimentum ejus qui spopondit pro extraneo,\n et pro alienis aufer ei pignus.\n14\u00a0Qui benedicit proximo suo voce grandi,\n de nocte consurgens maledicenti similis erit.\n15\u00a0Tecta perstillantia in die frigoris\n et litigiosa mulier comparantur.\n16\u00a0Qui retinet eam quasi qui ventum teneat,\n et oleum dexter\u00e6 su\u00e6 vocabit.\n17\u00a0Ferrum ferro exacuitur,\n et homo exacuit faciem amici sui.\n18\u00a0Qui servat ficum comedet fructus ejus,\n et qui custos est domini sui glorificabitur.\n19\u00a0Quomodo in aquis resplendent vultus prospicientium,\n sic corda hominum manifesta sunt prudentibus.\n20\u00a0Infernus et perditio numquam implentur:\n similiter et oculi hominum insatiabiles.\n21\u00a0Quomodo probatur in conflatorio argentum et in fornace aurum,\n sic probatur homo ore laudantis.\n Cor iniqui inquirit mala,\n cor autem rectum inquirit scientiam.\n22\u00a0Si contuderis stultum in pila\n quasi ptisanas feriente desuper pilo,\n non auferetur ab eo stultitia ejus.]\n \n23\u00a0[Diligenter agnosce vultum pecoris tui,\n tuosque greges considera:\n24\u00a0non enim habebis jugiter potestatem,\n sed corona tribuetur in generationem et generationem.\n25\u00a0Aperta sunt prata, et apparuerunt herb\u00e6 virentes,\n et collecta sunt f\u0153na de montibus.\n26\u00a0Agni ad vestimentum tuum,\n et h\u00e6di ad agri pretium.\n27\u00a0Sufficiat tibi lac caprarum in cibos tuos,\n et in necessaria domus tu\u00e6, et ad victum ancillis tuis.]","title":"Vulgate: Proverbs: Proverbs Chapter 27","type":"page"}