{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro028.htm","path":"bib/vul/pro028.htm","source_url":"https://sacred-texts.com/bib/vul/pro028.htm","text":"1\u00a0[Fugit impius nemine persequente;\n justus autem, quasi leo confidens, absque terrore erit.\n2\u00a0Propter peccata terr\u00e6 multi principes ejus;\n et propter hominis sapientiam, et horum scientiam qu\u00e6 dicuntur,\n vita ducis longior erit.\n3\u00a0Vir pauper calumnians pauperes\n similis est imbri vehementi in quo paratur fames.]\n \n4\u00a0[Qui derelinquunt legem laudant impium;\n qui custodiunt, succenduntur contra eum.\n5\u00a0Viri mali non cogitant judicium;\n qui autem inquirunt Dominum animadvertunt omnia.\n6\u00a0Melior est pauper ambulans in simplicitate sua\n quam dives in pravis itineribus.\n7\u00a0Qui custodit legem filius sapiens est;\n qui autem comessatores pascit confundit patrem suum.\n8\u00a0Qui coacervat divitias usuris et f\u0153nore,\n liberali in pauperes congregat eas.\n9\u00a0Qui declinat aures suas ne audiat legem,\n oratio ejus erit execrabilis.\n10\u00a0Qui decipit justos in via mala, in interitu suo corruet,\n et simplices possidebunt bona ejus.\n11\u00a0Sapiens sibi videtur vir dives;\n pauper autem prudens scrutabitur eum.\n12\u00a0In exsultatione justorum multa gloria est;\n regnantibus impiis, ruin\u00e6 hominum.\n13\u00a0Qui abscondit scelera sua non dirigetur;\n qui autem confessus fuerit et reliquerit ea, misericordiam consequetur.\n14\u00a0Beatus homo qui semper est pavidus;\n qui vero mentis est dur\u00e6 corruet in malum.\n15\u00a0Leo rugiens et ursus esuriens,\n princeps impius super populum pauperem.\n16\u00a0Dux indigens prudentia multos opprimet per calumniam;\n qui autem odit avaritiam, longi fient dies ejus.\n17\u00a0Hominem qui calumniatur anim\u00e6 sanguinem,\n si usque ad lacum fugerit, nemo sustinet.\n18\u00a0Qui ambulat simpliciter salvus erit;\n qui perversis graditur viis concidet semel.\n19\u00a0Qui operatur terram suam satiabitur panibus;\n qui autem sectatur otium replebitur egestate.]\n \n20\u00a0[Vir fidelis multum laudabitur;\n qui autem festinat ditari non erit innocens.\n21\u00a0Qui cognoscit in judicio faciem non bene facit;\n iste et pro buccella panis deserit veritatem.\n22\u00a0Vir qui festinat ditari, et aliis invidet,\n ignorat quod egestas superveniet ei.\n23\u00a0Qui corripit hominem gratiam postea inveniet apud eum,\n magis quam ille qui per lingu\u00e6 blandimenta decipit.\n24\u00a0Qui subtrahit aliquid a patre suo et a matre,\n et dicit hoc non esse peccatum,\n particeps homicid\u00e6 est.\n25\u00a0Qui se jactat et dilatat, jurgia concitat;\n qui vero sperat in Domino sanabitur.\n26\u00a0Qui confidit in corde suo stultus est;\n qui autem graditur sapienter, ipse salvabitur.\n27\u00a0Qui dat pauperi non indigebit;\n qui despicit deprecantem sustinebit penuriam.\n28\u00a0Cum surrexerint impii, abscondentur homines;\n cum illi perierint, multiplicabuntur justi.]","title":"Vulgate: Proverbs: Proverbs Chapter 28","type":"page"}