{"collection":"Bible & Christianity","html_url":"https://unchartedknowledge.5gfusion.net/browse/bib/vul/pro030.htm","path":"bib/vul/pro030.htm","source_url":"https://sacred-texts.com/bib/vul/pro030.htm","text":"1 Verba Congregantis, filii Vomentis. Visio quam locutus est vir cum quo est Deus, et qui Deo secum morante confortatus, ait:\n2\u00a0[Stultissimus sum virorum,\n et sapientia hominum non est mecum.\n3\u00a0Non didici sapientiam,\n et non novi scientiam sanctorum.\n4\u00a0Quis ascendit in c\u00e6lum, atque descendit?\n quis continuit spiritum in manibus suis?\n quis colligavit aquas quasi in vestimento?\n quis suscitavit omnes terminos terr\u00e6?\n quod nomen est ejus, et quod nomen filii ejus, si nosti?\n5\u00a0Omnis sermo Dei ignitus:\n clypeus est sperantibus in se.\n6\u00a0Ne addas quidquam verbis illius,\n et arguaris, inveniarisque mendax.\n7\u00a0Duo rogavi te:\n ne deneges mihi antequam moriar:\n8\u00a0vanitatem et verba mendacia longe fac a me;\n mendicitatem et divitias ne dederis mihi:\n tribue tantum victui meo necessaria,\n9\u00a0ne forte satiatus illiciar ad negandum,\n et dicam: Quis est Dominus?\n aut egestate compulsus, furer,\n et perjurem nomen Dei mei.\n10\u00a0Ne accuses servum ad dominum suum,\n ne forte maledicat tibi, et corruas.]\n \n11\u00a0[Generatio qu\u00e6 patri suo maledicit,\n et qu\u00e6 matri su\u00e6 non benedicit;\n12\u00a0generatio qu\u00e6 sibi munda videtur,\n et tamen non est lota a sordibus suis;\n13\u00a0generatio cujus excelsi sunt oculi,\n et palpebr\u00e6 ejus in alta surrect\u00e6;\n14\u00a0generatio qu\u00e6 pro dentibus gladios habet,\n et commandit molaribus suis,\n ut comedat inopes de terra,\n et pauperes ex hominibus.\n15\u00a0Sanguisug\u00e6 du\u00e6 sunt fili\u00e6,\n dicentes: Affer, affer.\n Tria sunt insaturabilia,\n et quartum quod numquam dicit: Sufficit.\n16\u00a0Infernus, et os vulv\u00e6,\n et terra qu\u00e6 non satiatur aqua:\n ignis vero numquam dicit: Sufficit.\n17\u00a0Oculum qui subsannat patrem,\n et qui despicit partum matris su\u00e6,\n effodiant eum corvi de torrentibus,\n et comedant eum filii aquil\u00e6!]\n \n18\u00a0[Tria sunt difficilia mihi,\n et quartum penitus ignoro:\n19\u00a0viam aquil\u00e6 in c\u00e6lo,\n viam colubri super petram,\n viam navis in medio mari,\n et viam viri in adolescentia.\n20\u00a0Talis est et via mulieris adulter\u00e6,\n qu\u00e6 comedit, et tergens os suum\n dicit: Non sum operata malum.\n21\u00a0Per tria movetur terra,\n et quartum non potest sustinere:\n22\u00a0per servum, cum regnaverit;\n per stultum, cum saturatus fuerit cibo;\n23\u00a0per odiosam mulierem, cum in matrimonio fuerit assumpta;\n et per ancillam, cum fuerit h\u00e6res domin\u00e6 su\u00e6.]\n \n24\u00a0[Quatuor sunt minima terr\u00e6,\n et ipsa sunt sapientiora sapientibus:\n25\u00a0formic\u00e6, populus infirmus,\n qui pr\u00e6parat in messe cibum sibi;\n26\u00a0lepusculus, plebs invalida,\n qui collocat in petra cubile suum;\n27\u00a0regem locusta non habet,\n et egreditur universa per turmas suas;\n28\u00a0stellio manibus nititur,\n et moratur in \u00e6dibus regis.\n29\u00a0Tria sunt qu\u00e6 bene gradiuntur,\n et quartum quod incedit feliciter:\n30\u00a0leo, fortissimus bestiarum,\n ad nullius pavebit occursum;\n31\u00a0gallus succinctus lumbos;\n et aries; nec est rex, qui resistat ei.\n32\u00a0Est qui stultus apparuit postquam elevatus est in sublime;\n si enim intellexisset, ori suo imposuisset manum.\n33\u00a0Qui autem fortiter premit ubera ad eliciendum lac exprimit butyrum;\n et qui vehementer emungit elicit sanguinem;\n et qui provocat iras producit discordias.]","title":"Vulgate: Proverbs: Proverbs Chapter 30","type":"page"}