{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa002.htm","path":"bib/vul/psa002.htm","source_url":"https://sacred-texts.com/bib/vul/psa002.htm","text":"1\u00a0[Quare fremuerunt gentes,\n et populi meditati sunt inania?\n2\u00a0Astiterunt reges terr\u00e6,\n et principes convenerunt in unum\n adversus Dominum, et adversus christum ejus.\n3\u00a0Dirumpamus vincula eorum,\n et projiciamus a nobis jugum ipsorum.\n4\u00a0Qui habitat in c\u00e6lis irridebit eos,\n et Dominus subsannabit eos.\n5\u00a0Tunc loquetur ad eos in ira sua,\n et in furore suo conturbabit eos.\n6\u00a0Ego autem constitutus sum rex ab eo\n super Sion, montem sanctum ejus,\n pr\u00e6dicans pr\u00e6ceptum ejus.\n7\u00a0Dominus dixit ad me: Filius meus es tu;\n ego hodie genui te.\n8\u00a0Postula a me, et dabo tibi gentes h\u00e6reditatem tuam,\n et possessionem tuam terminos terr\u00e6.\n9\u00a0Reges eos in virga ferrea,\n et tamquam vas figuli confringes eos.\n10\u00a0Et nunc, reges, intelligite;\n erudimini, qui judicatis terram.\n11\u00a0Servite Domino in timore,\n et exsultate ei cum tremore.\n12\u00a0Apprehendite disciplinam, nequando irascatur Dominus,\n et pereatis de via justa.\n13\u00a0Cum exarserit in brevi ira ejus,\n beati omnes qui confidunt in eo.]","title":"Vulgate: Psalms: Psalms Chapter 2","type":"page"}