{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa004.htm","path":"bib/vul/psa004.htm","source_url":"https://sacred-texts.com/bib/vul/psa004.htm","text":"1 In finem, in carminibus. Psalmus David.\n2\u00a0[Cum invocarem exaudivit me Deus justiti\u00e6 me\u00e6,\n in tribulatione dilatasti mihi.\n Miserere mei, et exaudi orationem meam.\n3\u00a0Filii hominum, usquequo gravi corde?\n ut quid diligitis vanitatem, et qu\u00e6ritis mendacium?\n4\u00a0Et scitote quoniam mirificavit Dominus sanctum suum;\n Dominus exaudiet me cum clamavero ad eum.\n5\u00a0Irascimini, et nolite peccare;\n qu\u00e6 dicitis in cordibus vestris, in cubilibus vestris compungimini.\n6\u00a0Sacrificate sacrificium justiti\u00e6, et sperate in Domino.\n Multi dicunt: Quis ostendit nobis bona?\n7\u00a0Signatum est super nos lumen vultus tui, Domine:\n dedisti l\u00e6titiam in corde meo.\n8\u00a0A fructu frumenti, vini, et olei sui, multiplicati sunt.\n9\u00a0In pace in idipsum dormiam, et requiescam;\n10 quoniam tu, Domine, singulariter in spe constituisti me.]","title":"Vulgate: Psalms: Psalms Chapter 4","type":"page"}