{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa005.htm","path":"bib/vul/psa005.htm","source_url":"https://sacred-texts.com/bib/vul/psa005.htm","text":"1 In finem, pro ea qu\u00e6 h\u00e6reditatem consequitur. Psalmus David.\n2\u00a0[Verba mea auribus percipe, Domine;\n intellige clamorem meum.\n3\u00a0Intende voci orationis me\u00e6,\n rex meus et Deus meus.\n4\u00a0Quoniam ad te orabo, Domine:\n mane exaudies vocem meam.\n5\u00a0Mane astabo tibi, et videbo\n quoniam non Deus volens iniquitatem tu es.\n6\u00a0Neque habitabit juxta te malignus,\n neque permanebunt injusti ante oculos tuos.\n7\u00a0Odisti omnes qui operantur iniquitatem;\n perdes omnes qui loquuntur mendacium.\n Virum sanguinum et dolosum abominabitur Dominus.\n8\u00a0Ego autem in multitudine misericordi\u00e6 tu\u00e6\n introibo in domum tuam;\n adorabo ad templum sanctum tuum in timore tuo.\n9\u00a0Domine, deduc me in justitia tua:\n propter inimicos meos dirige in conspectu tuo viam meam.\n10\u00a0Quoniam non est in ore eorum veritas;\n cor eorum vanum est.\n11\u00a0Sepulchrum patens est guttur eorum;\n linguis suis dolose agebant:\n judica illos, Deus.\n Decidant a cogitationibus suis;\n secundum multitudinem impietatum eorum expelle eos,\n quoniam irritaverunt te, Domine.\n12\u00a0Et l\u00e6tentur omnes qui sperant in te;\n in \u00e6ternum exsultabunt, et habitabis in eis.\n Et gloriabuntur in te omnes qui diligunt nomen tuum,\n13\u00a0quoniam tu benedices justo.\n Domine, ut scuto bon\u00e6 voluntatis tu\u00e6 coronasti nos.]","title":"Vulgate: Psalms: Psalms Chapter 5","type":"page"}