{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa006.htm","path":"bib/vul/psa006.htm","source_url":"https://sacred-texts.com/bib/vul/psa006.htm","text":"1 In finem, in carminibus. Psalmus David. Pro octava.\n2\u00a0[Domine, ne in furore tuo arguas me,\n neque in ira tua corripias me.\n3\u00a0Miserere mei, Domine, quoniam infirmus sum;\n sana me, Domine, quoniam conturbata sunt ossa mea.\n4\u00a0Et anima mea turbata est valde;\n sed tu, Domine, usquequo?\n5\u00a0Convertere, Domine, et eripe animam meam;\n salvum me fac propter misericordiam tuam.\n6\u00a0Quoniam non est in morte qui memor sit tui;\n in inferno autem quis confitebitur tibi?\n7\u00a0Laboravi in gemitu meo;\n lavabo per singulas noctes lectum meum:\n lacrimis meis stratum meum rigabo.\n8\u00a0Turbatus est a furore oculus meus;\n inveteravi inter omnes inimicos meos.\n9\u00a0Discedite a me omnes qui operamini iniquitatem,\n quoniam exaudivit Dominus vocem fletus mei.\n10\u00a0Exaudivit Dominus deprecationem meam;\n Dominus orationem meam suscepit.\n11\u00a0Erubescant, et conturbentur vehementer, omnes inimici mei;\n convertantur, et erubescant valde velociter.]","title":"Vulgate: Psalms: Psalms Chapter 6","type":"page"}