{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa007.htm","path":"bib/vul/psa007.htm","source_url":"https://sacred-texts.com/bib/vul/psa007.htm","text":"1 Psalmus David, quem cantavit Domino pro verbis Chusi, filii Jemini.\n2\u00a0[Domine Deus meus, in te speravi;\n salvum me fac ex omnibus persequentibus me, et libera me:\n3\u00a0nequando rapiat ut leo animam meam,\n dum non est qui redimat, neque qui salvum faciat.\n4\u00a0Domine Deus meus, si feci istud,\n si est iniquitas in manibus meis,\n5\u00a0si reddidi retribuentibus mihi mala,\n decidam merito ab inimicis meis inanis.\n6\u00a0Persequatur inimicus animam meam, et comprehendat;\n et conculcet in terra vitam meam,\n et gloriam meam in pulverem deducat.\n7\u00a0Exsurge, Domine, in ira tua,\n et exaltare in finibus inimicorum meorum:\n et exsurge, Domine Deus meus, in pr\u00e6cepto quod mandasti,\n8\u00a0et synagoga populorum circumdabit te:\n et propter hanc in altum regredere:\n9\u00a0Dominus judicat populos.\n Judica me, Domine, secundum justitiam meam,\n et secundum innocentiam meam super me.\n10\u00a0Consumetur nequitia peccatorum, et diriges justum,\n scrutans corda et renes, Deus.\n11\u00a0Justum adjutorium meum a Domino,\n qui salvos facit rectos corde.\n12\u00a0Deus judex justus, fortis, et patiens;\n numquid irascitur per singulos dies?\n13\u00a0Nisi conversi fueritis, gladium suum vibrabit;\n arcum suum tetendit, et paravit illum.\n14\u00a0Et in eo paravit vasa mortis,\n sagittas suas ardentibus effecit.\n15\u00a0Ecce parturiit injustitiam;\n concepit dolorem, et peperit iniquitatem.\n16\u00a0Lacum aperuit, et effodit eum;\n et incidit in foveam quam fecit.\n17\u00a0Convertetur dolor ejus in caput ejus,\n et in verticem ipsius iniquitas ejus descendet.\n18\u00a0Confitebor Domino secundum justitiam ejus,\n et psallam nomini Domini altissimi.]","title":"Vulgate: Psalms: Psalms Chapter 7","type":"page"}