{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa008.htm","path":"bib/vul/psa008.htm","source_url":"https://sacred-texts.com/bib/vul/psa008.htm","text":"1 In finem, pro torcularibus. Psalmus David.\n2\u00a0[Domine, Dominus noster,\n quam admirabile est nomen tuum in universa terra!\n quoniam elevata est magnificentia tua super c\u00e6los.\n3\u00a0Ex ore infantium et lactentium perfecisti laudem propter inimicos tuos,\n ut destruas inimicum et ultorem.\n4\u00a0Quoniam videbo c\u00e6los tuos, opera digitorum tuorum,\n lunam et stellas qu\u00e6 tu fundasti.\n5\u00a0Quid est homo, quod memor es ejus?\n aut filius hominis, quoniam visitas eum?\n6\u00a0Minuisti eum paulominus ab angelis;\n gloria et honore coronasti eum;\n7\u00a0et constituisti eum super opera manuum tuarum.\n8\u00a0Omnia subjecisti sub pedibus ejus,\n oves et boves universas,\n insuper et pecora campi,\n9\u00a0volucres c\u00e6li, et pisces maris\n qui perambulant semitas maris.\n10\u00a0Domine, Dominus noster,\n quam admirabile est nomen tuum in universa terra!]","title":"Vulgate: Psalms: Psalms Chapter 8","type":"page"}