{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa009.htm","path":"bib/vul/psa009.htm","source_url":"https://sacred-texts.com/bib/vul/psa009.htm","text":"1 In finem, pro occultis filii. Psalmus David.\n2\u00a0[Confitebor tibi, Domine, in toto corde meo;\n narrabo omnia mirabilia tua.\n3\u00a0L\u00e6tabor et exsultabo in te;\n psallam nomini tuo, Altissime.\n4\u00a0In convertendo inimicum meum retrorsum;\n infirmabuntur, et peribunt a facie tua.\n5\u00a0Quoniam fecisti judicium meum et causam meam;\n sedisti super thronum, qui judicas justitiam.\n6\u00a0Increpasti gentes, et periit impius:\n nomen eorum delesti in \u00e6ternum, et in s\u00e6culum s\u00e6culi.\n7\u00a0Inimici defecerunt frame\u00e6 in finem,\n et civitates eorum destruxisti.\n Periit memoria eorum cum sonitu;\n8\u00a0et Dominus in \u00e6ternum permanet.\n Paravit in judicio thronum suum,\n9\u00a0et ipse judicabit orbem terr\u00e6 in \u00e6quitate:\n judicabit populos in justitia.\n10\u00a0Et factus est Dominus refugium pauperi;\n adjutor in opportunitatibus, in tribulatione.\n11\u00a0Et sperent in te qui noverunt nomen tuum,\n quoniam non dereliquisti qu\u00e6rentes te, Domine.\n12\u00a0Psallite Domino qui habitat in Sion;\n annuntiate inter gentes studia ejus:\n13\u00a0quoniam requirens sanguinem eorum recordatus est;\n non est oblitus clamorem pauperum.\n14\u00a0Miserere mei, Domine:\n vide humilitatem meam de inimicis meis,\n15\u00a0qui exaltas me de portis mortis,\n ut annuntiem omnes laudationes tuas in portis fili\u00e6 Sion:\n16\u00a0exultabo in salutari tuo.\n Infix\u00e6 sunt gentes in interitu quem fecerunt;\n in laqueo isto quem absconderunt\n comprehensus est pes eorum.\n17\u00a0Cognoscetur Dominus judicia faciens;\n in operibus manuum suarum comprehensus est peccator.\n18\u00a0Convertantur peccatores in infernum,\n omnes gentes qu\u00e6 obliviscuntur Deum.\n19\u00a0Quoniam non in finem oblivio erit pauperis;\n patientia pauperum non peribit in finem.\n20\u00a0Exsurge, Domine; non confortetur homo:\n judicentur gentes in conspectu tuo.\n21\u00a0Constitue, Domine, legislatorem super eos,\n ut sciant gentes quoniam homines sunt.\n22\u00a0Ut quid, Domine, recessisti longe;\n despicis in opportunitatibus, in tribulatione?\n23\u00a0Dum superbit impius, incenditur pauper:\n comprehenduntur in consiliis quibus cogitant.\n24\u00a0Quoniam laudatur peccator in desideriis anim\u00e6 su\u00e6,\n et iniquus benedicitur.\n25\u00a0Exacerbavit Dominum peccator:\n secundum multitudinem ir\u00e6 su\u00e6, non qu\u00e6ret.\n26\u00a0Non est Deus in conspectu ejus;\n inquinat\u00e6 sunt vi\u00e6 illius in omni tempore.\n Auferuntur judicia tua a facie ejus;\n omnium inimicorum suorum dominabitur.\n27\u00a0Dixit enim in corde suo: Non movebor\n a generatione in generationem, sine malo.\n28\u00a0Cujus maledictione os plenum est, et amaritudine, et dolo;\n sub lingua ejus labor et dolor.\n29\u00a0Sedet in insidiis cum divitibus in occultis,\n ut interficiat innocentem.\n30\u00a0Oculi ejus in pauperem respiciunt;\n insidiatur in abscondito, quasi leo in spelunca sua.\n Insidiatur ut rapiat pauperem;\n rapere pauperem dum attrahit eum.\n31\u00a0In laqueo suo humiliabit eum;\n inclinabit se, et cadet cum dominatus fuerit pauperum.\n32\u00a0Dixit enim in corde suo: Oblitus est Deus;\n avertit faciem suam, ne videat in finem.\n33\u00a0Exsurge, Domine Deus, exaltetur manus tua;\n ne obliviscaris pauperum.\n34\u00a0Propter quid irritavit impius Deum?\n dixit enim in corde suo: Non requiret.\n35\u00a0Vides, quoniam tu laborem et dolorem consideras,\n ut tradas eos in manus tuas.\n Tibi derelictus est pauper;\n orphano tu eris adjutor.\n36\u00a0Contere brachium peccatoris et maligni;\n qu\u00e6retur peccatum illius, et non invenietur.\n37\u00a0Dominus regnabit in \u00e6ternum, et in s\u00e6culum s\u00e6culi;\n peribitis, gentes, de terra illius.\n38\u00a0Desiderium pauperum exaudivit Dominus;\n pr\u00e6parationem cordis eorum audivit auris tua:\n39\u00a0judicare pupillo et humili,\n ut non apponat ultra magnificare se homo super terram.]","title":"Vulgate: Psalms: Psalms Chapter 9","type":"page"}