{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa010.htm","path":"bib/vul/psa010.htm","source_url":"https://sacred-texts.com/bib/vul/psa010.htm","text":"1 In finem. Psalmus David.\n2\u00a0[In Domino confido; quomodo dicitis anim\u00e6 me\u00e6:\n Transmigra in montem sicut passer?\n3\u00a0Quoniam ecce peccatores intenderunt arcum;\n paraverunt sagittas suas in pharetra,\n ut sagittent in obscuro rectos corde:\n4\u00a0quoniam qu\u00e6 perfecisti destruxerunt;\n justus autem, quid fecit?\n5\u00a0Dominus in templo sancto suo;\n Dominus in c\u00e6lo sedes ejus.\n Oculi ejus in pauperem respiciunt;\n palpebr\u00e6 ejus interrogant filios hominum.\n6\u00a0Dominus interrogat justum et impium;\n qui autem diligit iniquitatem, odit animam suam.\n7\u00a0Pluet super peccatores laqueos;\n ignis et sulphur, et spiritus procellarum, pars calicis eorum.\n8\u00a0Quoniam justus Dominus, et justitias dilexit:\n \u00e6quitatem vidit vultus ejus.]","title":"Vulgate: Psalms: Psalms Chapter 10","type":"page"}