{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa012.htm","path":"bib/vul/psa012.htm","source_url":"https://sacred-texts.com/bib/vul/psa012.htm","text":"1\u00a0In finem. Psalmus David. [Usquequo, Domine, oblivisceris me in finem?\n usquequo avertis faciem tuam a me?\n2\u00a0quamdiu ponam consilia in anima mea;\n dolorem in corde meo per diem?\n3\u00a0usquequo exaltabitur inimicus meus super me?\n4\u00a0Respice, et exaudi me, Domine Deus meus.\n Illumina oculos meos, ne umquam obdormiam in morte;\n5\u00a0nequando dicat inimicus meus: Pr\u00e6valui adversus eum.\n Qui tribulant me exsultabunt si motus fuero;\n6\u00a0ego autem in misericordia tua speravi.\n Exsultabit cor meum in salutari tuo.\n Cantabo Domino qui bona tribuit mihi;\n et psallam nomini Domini altissimi.]","title":"Vulgate: Psalms: Psalms Chapter 12","type":"page"}