{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa014.htm","path":"bib/vul/psa014.htm","source_url":"https://sacred-texts.com/bib/vul/psa014.htm","text":"1\u00a0Psalmus David. [Domine, quis habitabit in tabernaculo tuo?\n aut quis requiescet in monte sancto tuo?\n2\u00a0Qui ingreditur sine macula,\n et operatur justitiam;\n3\u00a0qui loquitur veritatem in corde suo:\n qui non egit dolum in lingua sua,\n nec fecit proximo suo malum,\n et opprobrium non accepit adversus proximos suos.\n4\u00a0Ad nihilum deductus est in conspectu ejus malignus;\n timentes autem Dominum glorificat.\n Qui jurat proximo suo, et non decipit;\n5\u00a0qui pecuniam suam non dedit ad usuram,\n et munera super innocentem non accepit:\n qui facit h\u00e6c non movebitur in \u00e6ternum.]","title":"Vulgate: Psalms: Psalms Chapter 14","type":"page"}