{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa015.htm","path":"bib/vul/psa015.htm","source_url":"https://sacred-texts.com/bib/vul/psa015.htm","text":"1\u00a0Tituli inscriptio, ipsi David. [Conserva me, Domine, quoniam speravi in te.\n2\u00a0Dixi Domino: Deus meus es tu,\n quoniam bonorum meorum non eges.\n3\u00a0Sanctis qui sunt in terra ejus,\n mirificavit omnes voluntates meas in eis.\n4\u00a0Multiplicat\u00e6 sunt infirmitates eorum:\n postea acceleraverunt.\n Non congregabo conventicula eorum de sanguinibus,\n nec memor ero nominum eorum per labia mea.\n5\u00a0Dominus pars h\u00e6reditatis me\u00e6, et calicis mei:\n tu es qui restitues h\u00e6reditatem meam mihi.\n6\u00a0Funes ceciderunt mihi in pr\u00e6claris;\n etenim h\u00e6reditas mea pr\u00e6clara est mihi.\n7\u00a0Benedicam Dominum qui tribuit mihi intellectum;\n insuper et usque ad noctem increpuerunt me renes mei.\n8\u00a0Providebam Dominum in conspectu meo semper:\n quoniam a dextris est mihi, ne commovear.\n9\u00a0Propter hoc l\u00e6tatum est cor meum, et exsultavit lingua mea;\n insuper et caro mea requiescet in spe.\n10\u00a0Quoniam non derelinques animam meam in inferno,\n nec dabis sanctum tuum videre corruptionem.\n Notas mihi fecisti vias vit\u00e6;\n adimplebis me l\u00e6titia cum vultu tuo:\n delectationes in dextera tua usque in finem.]","title":"Vulgate: Psalms: Psalms Chapter 15","type":"page"}