{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa016.htm","path":"bib/vul/psa016.htm","source_url":"https://sacred-texts.com/bib/vul/psa016.htm","text":"1\u00a0Oratio David. [Exaudi, Domine, justitiam meam;\n intende deprecationem meam.\n Auribus percipe orationem meam,\n non in labiis dolosis.\n2\u00a0De vultu tuo judicium meum prodeat;\n oculi tui videant \u00e6quitates.\n3\u00a0Probasti cor meum, et visitasti nocte;\n igne me examinasti, et non est inventa in me iniquitas.\n4\u00a0Ut non loquatur os meum opera hominum:\n propter verba labiorum tuorum, ego custodivi vias duras.\n5\u00a0Perfice gressus meos in semitis tuis,\n ut non moveantur vestigia mea.\n6\u00a0Ego clamavi, quoniam exaudisti me, Deus;\n inclina aurem tuam mihi, et exaudi verba mea.\n7\u00a0Mirifica misericordias tuas,\n qui salvos facis sperantes in te.\n8\u00a0A resistentibus dexter\u00e6 tu\u00e6 custodi me\n ut pupillam oculi.\n Sub umbra alarum tuarum protege me\n9\u00a0a facie impiorum qui me afflixerunt.\n Inimici mei animam meam circumdederunt;\n10\u00a0adipem suum concluserunt:\n os eorum locutum est superbiam.\n11\u00a0Projicientes me nunc circumdederunt me;\n oculos suos statuerunt declinare in terram.\n12\u00a0Susceperunt me sicut leo paratus ad pr\u00e6dam,\n et sicut catulus leonis habitans in abditis.\n13\u00a0Exsurge, Domine: pr\u00e6veni eum, et supplanta eum:\n eripe animam meam ab impio;\n frameam tuam\n14\u00a0ab inimicis manus tu\u00e6.\n Domine, a paucis de terra divide eos in vita eorum;\n de absconditis tuis adimpletus est venter eorum.\n Saturati sunt filiis,\n et dimiserunt reliquias suas parvulis suis.\n15\u00a0Ego autem in justitia apparebo conspectui tuo;\n satiabor cum apparuerit gloria tua.]","title":"Vulgate: Psalms: Psalms Chapter 16","type":"page"}