{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa017.htm","path":"bib/vul/psa017.htm","source_url":"https://sacred-texts.com/bib/vul/psa017.htm","text":"1 In finem. Puero Domini David, qui locutus est Domino verba cantici hujus, in die qua eripuit eum Dominus de manu omnium inimicorum ejus, et de manu Saul, et dixit:\n2\u00a0[Diligam te, Domine, fortitudo mea.\n3\u00a0Dominus firmamentum meum, et refugium meum, et liberator meus.\n Deus meus adjutor meus, et sperabo in eum;\n protector meus, et cornu salutis me\u00e6, et susceptor meus.\n4\u00a0Laudans invocabo Dominum,\n et ab inimicis meis salvus ero.\n5\u00a0Circumdederunt me dolores mortis,\n et torrentes iniquitatis conturbaverunt me.\n6\u00a0Dolores inferni circumdederunt me;\n pr\u00e6occupaverunt me laquei mortis.\n7\u00a0In tribulatione mea invocavi Dominum,\n et ad Deum meum clamavi:\n et exaudivit de templo sancto suo vocem meam;\n et clamor meus in conspectu ejus introivit in aures ejus.\n8\u00a0Commota est, et contremuit terra;\n fundamenta montium conturbata sunt, et commota sunt:\n quoniam iratus est eis.\n9\u00a0Ascendit fumus in ira ejus,\n et ignis a facie ejus exarsit;\n carbones succensi sunt ab eo.\n10\u00a0Inclinavit c\u00e6los, et descendit,\n et caligo sub pedibus ejus.\n11\u00a0Et ascendit super cherubim, et volavit;\n volavit super pennas ventorum.\n12\u00a0Et posuit tenebras latibulum suum;\n in circuitu ejus tabernaculum ejus,\n tenebrosa aqua in nubibus a\u00ebris.\n13\u00a0Pr\u00e6 fulgore in conspectu ejus nubes transierunt;\n grando et carbones ignis.\n14\u00a0Et intonuit de c\u00e6lo Dominus,\n et Altissimus dedit vocem suam:\n grando et carbones ignis.\n15\u00a0Et misit sagittas suas, et dissipavit eos;\n fulgura multiplicavit, et conturbavit eos.\n16\u00a0Et apparuerunt fontes aquarum,\n et revelata sunt fundamenta orbis terrarum,\n ab increpatione tua, Domine,\n ab inspiratione spiritus ir\u00e6 tu\u00e6.\n17\u00a0Misit de summo, et accepit me;\n et assumpsit me de aquis multis.\n18\u00a0Eripuit me de inimicis meis fortissimis, et ab his qui oderunt me.\n Quoniam confortati sunt super me;\n19\u00a0pr\u00e6venerunt me in die afflictionis me\u00e6:\n et factus est Dominus protector meus.\n20\u00a0Et eduxit me in latitudinem;\n salvum me fecit, quoniam voluit me,\n21\u00a0et retribuet mihi Dominus secundum justitiam meam,\n et secundum puritatem manuum mearum retribuet mihi:\n22\u00a0quia custodivi vias Domini,\n nec impie gessi a Deo meo;\n23\u00a0quoniam omnia judicia ejus in conspectu meo,\n et justitias ejus non repuli a me.\n24\u00a0Et ero immaculatus cum eo;\n et observabo me ab iniquitate mea.\n25\u00a0Et retribuet mihi Dominus secundum justitiam meam,\n et secundum puritatem manuum mearum in conspectu oculorum ejus.\n26\u00a0Cum sancto sanctus eris,\n et cum viro innocente innocens eris,\n27\u00a0et cum electo electus eris,\n et cum perverso perverteris.\n28\u00a0Quoniam tu populum humilem salvum facies,\n et oculos superborum humiliabis.\n29\u00a0Quoniam tu illuminas lucernam meam, Domine;\n Deus meus, illumina tenebras meas.\n30\u00a0Quoniam in te eripiar a tentatione;\n et in Deo meo transgrediar murum.\n31\u00a0Deus meus, impolluta via ejus;\n eloquia Domini igne examinata:\n protector est omnium sperantium in se.\n32\u00a0Quoniam quis deus pr\u00e6ter Dominum?\n aut quis deus pr\u00e6ter Deum nostrum?\n33\u00a0Deus qui pr\u00e6cinxit me virtute,\n et posuit immaculatam viam meam;\n34\u00a0qui perfecit pedes meos tamquam cervorum,\n et super excelsa statuens me;\n35\u00a0qui docet manus meas ad pr\u00e6lium.\n Et posuisti, ut arcum \u00e6reum, brachia mea,\n36\u00a0et dedisti mihi protectionem salutis tu\u00e6:\n et dextera tua suscepit me,\n et disciplina tua correxit me in finem,\n et disciplina tua ipsa me docebit.\n37\u00a0Dilatasti gressus meos subtus me,\n et non sunt infirmata vestigia mea.\n38\u00a0Persequar inimicos meos, et comprehendam illos;\n et non convertar donec deficiant.\n39\u00a0Confringam illos, nec poterunt stare;\n cadent subtus pedes meos.\n40\u00a0Et pr\u00e6cinxisti me virtute ad bellum,\n et supplantasti insurgentes in me subtus me.\n41\u00a0Et inimicos meos dedisti mihi dorsum,\n et odientes me disperdidisti.\n42\u00a0Clamaverunt, nec erat qui salvos faceret;\n ad Dominum, nec exaudivit eos.\n43\u00a0Et comminuam eos ut pulverem ante faciem venti;\n ut lutum platearum delebo eos.\n44\u00a0Eripies me de contradictionibus populi;\n constitues me in caput gentium.\n45\u00a0Populus quem non cognovi servivit mihi;\n in auditu auris obedivit mihi.\n46\u00a0Filii alieni mentiti sunt mihi,\n filii alieni inveterati sunt,\n et claudicaverunt a semitis suis.\n47\u00a0Vivit Dominus, et benedictus Deus meus,\n et exaltetur Deus salutis me\u00e6.\n48\u00a0Deus qui das vindictas mihi,\n et subdis populos sub me;\n liberator meus de inimicis meis iracundis.\n49\u00a0Et ab insurgentibus in me exaltabis me;\n a viro iniquo eripies me.\n50\u00a0Propterea confitebor tibi in nationibus, Domine,\n et nomini tuo psalmum dicam;\n51\u00a0magnificans salutes regis ejus,\n et faciens misericordiam christo suo David,\n et semini ejus usque in s\u00e6culum.]","title":"Vulgate: Psalms: Psalms Chapter 17","type":"page"}