{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa018.htm","path":"bib/vul/psa018.htm","source_url":"https://sacred-texts.com/bib/vul/psa018.htm","text":"1 In finem. Psalmus David.\n2\u00a0[C\u00e6li enarrant gloriam Dei,\n et opera manuum ejus annuntiat firmamentum.\n3\u00a0Dies diei eructat verbum,\n et nox nocti indicat scientiam.\n4\u00a0Non sunt loquel\u00e6, neque sermones,\n quorum non audiantur voces eorum.\n5\u00a0In omnem terram exivit sonus eorum,\n et in fines orbis terr\u00e6 verba eorum.\n6\u00a0In sole posuit tabernaculum suum;\n et ipse tamquam sponsus procedens de thalamo suo.\n Exsultavit ut gigas ad currendam viam;\n7\u00a0a summo c\u00e6lo egressio ejus.\n Et occursus ejus usque ad summum ejus;\n nec est qui se abscondat a calore ejus.\n8\u00a0Lex Domini immaculata, convertens animas;\n testimonium Domini fidele, sapientiam pr\u00e6stans parvulis.\n9\u00a0Justiti\u00e6 Domini rect\u00e6, l\u00e6tificantes corda;\n pr\u00e6ceptum Domini lucidum, illuminans oculos.\n10\u00a0Timor Domini sanctus, permanens in s\u00e6culum s\u00e6culi;\n judicia Domini vera, justificata in semetipsa,\n11\u00a0desiderabilia super aurum et lapidem pretiosum multum,\n et dulciora super mel et favum.\n12\u00a0Etenim servus tuus custodit ea;\n in custodiendis illis retributio multa.\n13\u00a0Delicta quis intelligit?\n ab occultis meis munda me;\n14\u00a0et ab alienis parce servo tuo.\n Si mei non fuerint dominati, tunc immaculatus ero,\n et emundabor a delicto maximo.\n15\u00a0Et erunt ut complaceant eloquia oris mei,\n et meditatio cordis mei in conspectu tuo semper.\n Domine, adjutor meus, et redemptor meus.]","title":"Vulgate: Psalms: Psalms Chapter 18","type":"page"}