{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa019.htm","path":"bib/vul/psa019.htm","source_url":"https://sacred-texts.com/bib/vul/psa019.htm","text":"1 In finem. Psalmus David.\n2\u00a0[Exaudiat te Dominus in die tribulationis;\n protegat te nomen Dei Jacob.\n3\u00a0Mittat tibi auxilium de sancto,\n et de Sion tueatur te.\n4\u00a0Memor sit omnis sacrificii tui,\n et holocaustum tuum pingue fiat.\n5\u00a0Tribuat tibi secundum cor tuum,\n et omne consilium tuum confirmet.\n6\u00a0L\u00e6tabimur in salutari tuo;\n et in nomine Dei nostri magnificabimur.\n7\u00a0Impleat Dominus omnes petitiones tuas;\n nunc cognovi quoniam salvum fecit Dominus christum suum.\n Exaudiet illum de c\u00e6lo sancto suo,\n in potentatibus salus dexter\u00e6 ejus.\n8\u00a0Hi in curribus, et hi in equis;\n nos autem in nomine Domini Dei nostri invocabimus.\n9\u00a0Ipsi obligati sunt, et ceciderunt;\n nos autem surreximus, et erecti sumus.\n10\u00a0Domine, salvum fac regem,\n et exaudi nos in die qua invocaverimus te.]","title":"Vulgate: Psalms: Psalms Chapter 19","type":"page"}