{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa020.htm","path":"bib/vul/psa020.htm","source_url":"https://sacred-texts.com/bib/vul/psa020.htm","text":"1 In finem. Psalmus David.\n2\u00a0[Domine, in virtute tua l\u00e6tabitur rex,\n et super salutare tuum exsultabit vehementer.\n3\u00a0Desiderium cordis ejus tribuisti ei,\n et voluntate labiorum ejus non fraudasti eum.\n4\u00a0Quoniam pr\u00e6venisti eum in benedictionibus dulcedinis;\n posuisti in capite ejus coronam de lapide pretioso.\n5\u00a0Vitam petiit a te, et tribuisti ei longitudinem dierum,\n in s\u00e6culum, et in s\u00e6culum s\u00e6culi.\n6\u00a0Magna est gloria ejus in salutari tuo;\n gloriam et magnum decorem impones super eum.\n7\u00a0Quoniam dabis eum in benedictionem in s\u00e6culum s\u00e6culi;\n l\u00e6tificabis eum in gaudio cum vultu tuo.\n8\u00a0Quoniam rex sperat in Domino,\n et in misericordia Altissimi non commovebitur.\n9\u00a0Inveniatur manus tua omnibus inimicis tuis;\n dextera tua inveniat omnes qui te oderunt.\n10\u00a0Pones eos ut clibanum ignis in tempore vultus tui:\n Dominus in ira sua conturbabit eos,\n et devorabit eos ignis.\n11\u00a0Fructum eorum de terra perdes,\n et semen eorum a filiis hominum,\n12\u00a0quoniam declinaverunt in te mala;\n cogitaverunt consilia qu\u00e6 non potuerunt stabilire.\n13\u00a0Quoniam pones eos dorsum;\n in reliquiis tuis pr\u00e6parabis vultum eorum.\n14\u00a0Exaltare, Domine, in virtute tua;\n cantabimus et psallemus virtutes tuas.]","title":"Vulgate: Psalms: Psalms Chapter 20","type":"page"}