{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa021.htm","path":"bib/vul/psa021.htm","source_url":"https://sacred-texts.com/bib/vul/psa021.htm","text":"1 In finem, pro susceptione matutina. Psalmus David.\n2\u00a0[Deus, Deus meus, respice in me: quare me dereliquisti?\n longe a salute mea verba delictorum meorum.\n3\u00a0Deus meus, clamabo per diem, et non exaudies;\n et nocte, et non ad insipientiam mihi.\n4\u00a0Tu autem in sancto habitas, laus Isra\u00ebl.\n5\u00a0In te speraverunt patres nostri;\n speraverunt, et liberasti eos.\n6\u00a0Ad te clamaverunt, et salvi facti sunt;\n in te speraverunt, et non sunt confusi.\n7\u00a0Ego autem sum vermis, et non homo;\n opprobrium hominum, et abjectio plebis.\n8\u00a0Omnes videntes me deriserunt me;\n locuti sunt labiis, et moverunt caput.\n9\u00a0Speravit in Domino, eripiat eum:\n salvum faciat eum, quoniam vult eum.\n10\u00a0Quoniam tu es qui extraxisti me de ventre,\n spes mea ab uberibus matris me\u00e6.\n11\u00a0In te projectus sum ex utero;\n de ventre matris me\u00e6 Deus meus es tu:\n12\u00a0ne discesseris a me,\n quoniam tribulatio proxima est,\n quoniam non est qui adjuvet.\n13\u00a0Circumdederunt me vituli multi;\n tauri pingues obsederunt me.\n14\u00a0Aperuerunt super me os suum,\n sicut leo rapiens et rugiens.\n15\u00a0Sicut aqua effusus sum,\n et dispersa sunt omnia ossa mea:\n factum est cor meum tamquam cera liquescens in medio ventris mei.\n16\u00a0Aruit tamquam testa virtus mea,\n et lingua mea adh\u00e6sit faucibus meis:\n et in pulverem mortis deduxisti me.\n17\u00a0Quoniam circumdederunt me canes multi;\n concilium malignantium obsedit me.\n Foderunt manus meas et pedes meos;\n18\u00a0dinumeraverunt omnia ossa mea.\n Ipsi vero consideraverunt et inspexerunt me.\n19\u00a0Diviserunt sibi vestimenta mea,\n et super vestem meam miserunt sortem.\n20\u00a0Tu autem, Domine, ne elongaveris auxilium tuum a me;\n ad defensionem meam conspice.\n21\u00a0Erue a framea, Deus, animam meam,\n et de manu canis unicam meam.\n22\u00a0Salva me ex ore leonis,\n et a cornibus unicornium humilitatem meam.\n23\u00a0Narrabo nomen tuum fratribus meis;\n in medio ecclesi\u00e6 laudabo te.\n24\u00a0Qui timetis Dominum, laudate eum;\n universum semen Jacob, glorificate eum.\n25\u00a0Timeat eum omne semen Isra\u00ebl,\n quoniam non sprevit, neque despexit deprecationem pauperis,\n nec avertit faciem suam a me:\n et cum clamarem ad eum, exaudivit me.\n26\u00a0Apud te laus mea in ecclesia magna;\n vota mea reddam in conspectu timentium eum.\n27\u00a0Edent pauperes, et saturabuntur,\n et laudabunt Dominum qui requirunt eum:\n vivent corda eorum in s\u00e6culum s\u00e6culi.\n28\u00a0Reminiscentur et convertentur ad Dominum universi fines terr\u00e6;\n et adorabunt in conspectu ejus univers\u00e6 famili\u00e6 gentium:\n29\u00a0quoniam Domini est regnum,\n et ipse dominabitur gentium.\n30\u00a0Manducaverunt et adoraverunt omnes pingues terr\u00e6;\n in conspectu ejus cadent omnes qui descendunt in terram.\n31\u00a0Et anima mea illi vivet;\n et semen meum serviet ipsi.\n32\u00a0Annuntiabitur Domino generatio ventura;\n et annuntiabunt c\u00e6li justitiam ejus\n populo qui nascetur, quem fecit Dominus.]","title":"Vulgate: Psalms: Psalms Chapter 21","type":"page"}