{"collection":"Bible & Christianity","html_url":"https://unchartedknowledge.5gfusion.net/browse/bib/vul/psa022.htm","path":"bib/vul/psa022.htm","source_url":"https://sacred-texts.com/bib/vul/psa022.htm","text":"1\u00a0Psalmus David. [Dominus regit me, et nihil mihi deerit:\n2\u00a0in loco pascu\u00e6, ibi me collocavit.\n Super aquam refectionis educavit me;\n3\u00a0animam meam convertit.\n Deduxit me super semitas justiti\u00e6\n propter nomen suum.\n4\u00a0Nam etsi ambulavero in medio umbr\u00e6 mortis,\n non timebo mala, quoniam tu mecum es.\n Virga tua, et baculus tuus,\n ipsa me consolata sunt.\n5\u00a0Parasti in conspectu meo mensam\n adversus eos qui tribulant me;\n impinguasti in oleo caput meum:\n et calix meus inebrians, quam pr\u00e6clarus est!\n6\u00a0Et misericordia tua subsequetur me\n omnibus diebus vit\u00e6 me\u00e6;\n et ut inhabitem in domo Domini\n in longitudinem dierum.]","title":"Vulgate: Psalms: Psalms Chapter 22","type":"page"}